Үндістан мен Пәкістанға «Бипарджой» дауылы жақындады
Үндістан мен Пәкістанға әсер етуі күтілген «Бипарджой» дауылы салдарынан эвакуацияланған адам саны 150 мыңнан асты.
Пәкістанның метеорологиялық департаменті дауылдың елдің оңтүстік бөліктеріне, соның ішінде порт қаласы Карачиге қарай жылжып жатқанын және бүгіннен бастап қатты жел мен жаңбыр жауатынын хабарлады.
Аймақтық Апаттар Басқармасы Пәкістан мен Үндістанның жағалау аймақтарына әсер етуі күтілген дауылдың салдарынан Пәкістанның Бадин, Татта, Сужавал және Малир аймақтарынан осы уақытқа дейін 81 мың 925 адамның эвакуацияланғанын хабарлады.
Эвакуация және көмек көрсету шараларын қолдау үшін жағалаудағы аудандарға құрлық және теңіз күштері жіберілді.
Эвакуацияланғандар үшін Бадин, Татта, Сужавал және Малирде көмек көрсету және сауықтыру лагерлері құрылды.
Билік балықшыларға дауыл қаупі сейілгенше (17 маусым) теңізге шықпауға кеңес берді.
Үндістанның Гуджарат штатында жүк кемелері қатынасы тоқтатылды. Бұған қоса Кандла портында 3 мыңдай адам қауіпсіз жерге көшірілген.
