Қырғызстаннан Қазақстанға күніне 500-ге дейін жүк көлігі кіріп жатыр, ал бұл көліктердің тексерілуі қанша уақыт алады?
Бұл туралы ҚР Ұлттық қауіпсіздік комитетінің «ҚазАқпарат» агенттігіне қойған сұрағына, «Жүк көлігін тексеру уақыты өзгермеді. Себебі, ҚР Үкіметінің қаулысымен бекітілген Мемлекеттік шекараны санаттау қағидаларының талаптарына сәйкес, бір жүк көлігін тексеруге 25 минут уақыт қарастырылған. Қырғызстаннан біздің елге қазір күніне 400-ден 500-ге дейін жүк көлігі кіріп жатыр», деп жауап берілген.
Қазақстанға Қырғызстаннан жүк көліктері арқылы негізінен халық тұтынатын тауарлар (киім-кешек, аяқ киім, кеңсе заттары, қағаз бұйымдар және тағы басқасы), жеміс-көкөніс өнімдері (қарбыз, қауын, қызанақ, қияр және тағы басқасы), сүт өнімдері, құрылыс материалдары (бояулар, лактар, еріткіштер) тасымалданады.
«Жүк көліктерінің шамамен 60% транзит арқылы Қазақстан Республикасынан Ресей Федерациясына өтеді», — деп нақтылады комитет.
Сондай-ақ мәлім етілгендей, 2023 жылдың басынан Қырғызстаннан келген көліктерге жасырып, есірткі заттарын тасымалдаудың 20-дан астам фактісі анықталған.
Айта кетейік, Мемлекеттік шекара арқылы өткізілетін тауарлардың (жүктердің) мониторингін ҚР Қаржы министрлігінің Мемлекеттік кірістер комитеті жүзеге асырады.
Биыл 21 тамызда Қазақстан мен Қырғызстан шекарасындағы бақылау-өткізу пунктінің алдында жүк көліктері кептеліп тұрғаны хабарланған еді.
Кейін Ұлттық қауіпсіздік комитеті шекарада ешқандай шектеу қойылмағанын мәлімдеді.
