Қырғызстанда Талғат Бигелдиновті еске алу шарасы өтті
Кеше, Бішкек қаласында Екінші дүниежүзілік соғыстағы жеңістің 78 жылдығы қарсаңында екі мәрте Кеңес Одағының Батыры Талғат Бигелдинов пен соғыста қаза тапқандарды еске алу шарасы өтті.
Қазақстанның Қырғызстан Республикасындағы Елшілігінің қызметкерлері мен олардың отбасы мүшелері, Қырғызстан халқы ассамблеясы мен Қырғызстандағы қазақтар қауымдастығының өкілдері қазақтың аты аңызға айналған ұшқышы Талғат Бигелдиновтің мүсініне гүл шоқтарын қойып, Екінші дүниежүзілік соғысқа қатысушыларға тағзым етті.
Белгілі ұшқыштың балалық және жастық шағы Бішкек қаласында өтті. Талғат Бигелдинов 16 жасында Бішкектегі аэроклубқа оқуға түсті. 1940 жылы Қызыл Армия қатарына алынып, әуелі Балашов атындағы Әскери авиация училищесіне оқуға түсіп, одан Чкалов әскери авиация училищесіне ауыстырылды, оны 1942 жылы бітірді.
Алғашқы Кеңес Одағының Батыры атағы аға лейтенант Т.Бигелдиновке 1944 жылдың қазан айында майданда және тылдағы ерлігі мен жауынгерлік шеберлігі үшін, сондай-ақ әуе шайқастарында жаудың төрт ұшағын жеке өзі атып түсіргені үшін берілді.
1945 жылы 27 маусымда эскадрильяны шебер басқарғаны және Краков, Оппельн, Катовице, Бреслау және Берлинде жау әскері мен техникасын жинақтауға қарсы шабуыл кезінде көрсеткен жауынгерлік ерлігі үшін Талғат Бигелдиновке екінші рет Кеңес Одағының Батыры атағы берілді.
