Қазақстанда ең төменгі жалақы мөлшері 110 мың теңгеге дейін көтеріледі

Қазақстан президенті Қасым-Жомарт Тоқаев 2027 жылдың 1 қаңтарынан бастап ең төменгі жалақы мөлшерін (ЕТЖМ) 110 мың теңгеге дейін көтеруді тапсырды, деп хабарлайды Kapital.kz іскерлік ақпарат орталығы Ақордаға сілтеме жасап.

«Мен Үкіметке ең төменгі жалақы мөлшерін 85 мыңнан 110 мың теңгеге дейін көтеруді тапсырамын. Осы міндет келесі жылдың 1 қаңтарынан бастап іске асырылуға тиіс. Бұл 1,8 миллион адамның, соның ішінде бюджеттен жалақы алатын 370 мыңнан астам қызметкердің табысын арттыруға ықпал етеді», – деді Қасым-Жомарт Тоқаев Қазақстан халқына кезекті Жолдауында сөйлеген сөзінде.

Сондай-ақ ол Үкіметке 2027 жылдың 1 қаңтарынан бастап алғашқы медициналық-санитарлық көмек жүйесінде жұмыс істейтін учаскелік қызмет мамандарының жалақысын үздіксіз еңбек өтініне қарай 40%-ға дейін ұлғайтуды тапсырды. Бұл 77 мыңнан астам маманның табысын арттыруға мүмкіндік береді.

Еске сала кетейік, 2026 жылдың сәуірінде ұлттық экономиканың бірінші вице-министрі Азамат Әмрин Қазақстанда жақын болашақта ең төменгі жалақыны 150 мың теңгеге дейін көтеру мүмкіндігі әзірге қарастырылып жатпағанын, өйткені бұл шешім республикалық бюджеттің жағдайымен тікелей байланысты екенін және 2026 жылғы қаржылық жылдың қорытындысына тәуелді болатынын атап өткен еді.

Еске сала кетейік, 2026 жылдың 1 қаңтарынан бастап мынадай көрсеткіштер белгіленген болатын:

• ең төменгі жалақы мөлшері – 85 000 теңге;

• мемлекеттік базалық зейнетақы төлемінің ең төменгі мөлшері – 35 596 теңге;

• зейнетақының ең төменгі мөлшері – 69 049 теңге;

• АЕК – 4 325 теңге;

• ең төменгі күнкөріс деңгейінің мөлшері – 50 851 теңге.