Қаржылық пирамидалар мен интернет алаяқтық – ШҚО тұрғындарына сақтық ескертілді
“Заң мен тәртіп” нарративін ілгерілету аясында ШҚО бойынша экономикалық тергеп-тексеру департаментінің ұйымдастыруымен Шемонаиха ауданы Выдриха ауылында семинар өтті.
Жиынға жергілікті атқарушы органдардың өкілдері, Қаржы нарығын реттеу және дамыту агенттігінің өңірлік мамандары, сондай-ақ «AMANAT» партиясы жанындағы «Қарызсыз қоғам» жобасының менторы қатысты.
Іс-шараның негізгі мақсаты – халықтың қаржылық сауаттылығын арттыру. Сонымен қатар, тұрғындарды қаржылық қауіпсіздіктің негізгі бағыттарымен таныстыру болды. Семинарға интернет алаяқтарының жиі нысанасына айналатын зейнеткерлер шақырылды.
Жиында «Алаяқтарға тап болған жағдайда кімге жүгінуге болады?» деген сауал қойылды. ҚР Қаржы нарығын реттеу және дамыту агенттігінің Өскемен қаласындағы өңірлік өкілдер басқармасының бас маманы Еламан Дәулетбек ең алдымен полицияға хабарласу қажеттігін айтты. Оның сөзінше, дер кезінде жасалған қадамдар азаматтардың құқықтары мен қаржысын қорғауға, сондай-ақ алаяқтық әрекеттердің жолын кесуге мүмкіндік береді.
Семинар барысында қатысушыларға қаржылық сауаттылықтың негізгі қағидалары түсіндірілді. Қаржы пирамидаларының жұмыс істеу тәсілдері, дропперлер арқылы жасалатын заңсыз әрекеттердің қауіптілігі, интернеттегі фишинг шабуылдарының ерекшеліктері мен қаржылық алаяқтықтың кең таралған түрлері жайлы ақпарат берілді.
– Дропперлер – қылмыстық әрекеттердің шынайы ұйымдастырушыларын жасыру үшін пайдаланылатын адамдар. Олар психологияны жақсы меңгерген, интеллектуалды деңгейі жоғары болғандықтан, олардың айласына түсіп қалу ықтималдығы жоғары. Сондықтан әрқашан сақтық таныту қажет, – деді департамент тергеушісі Гаухар Әшімхан.
Семинар азаматтарға күмәнді қаржылық схемаларды ажырата білуге және өз қаражатын қорғау дағдысын дамытуға бағытталды. Сондай-ақ киберқауіпсіздік шаралары талқыланып, қатысушылар арасында белсенді пікірталас өтті.
Іс-шара халықтың қаржылық сауаттылығын арттыруға арналған қаржылық мониторинг органдарының алдын алу жұмыстарының бір бөлігі болып саналады.
