Өзбекстан тұңғыш рет Олимпиадаға жолдама алды

Темур Кападзе шәкірттері Парижде өтетін төрт жылдықтың ең танымал спорт жарысына қатысады.

Дохада өткен жартылай финалдық кездесудің бірінші таймында Өзбекстан құрамасында бірнеше мүмкіндік болғанымен, есеп ашылған жоқ.

63-минутта индонезиялықтар есеп ашқанымен, бас төреші VAR тексерісінен кейін офсайд жағдайын жазып, голды есепке алмады.

68-минутта Хусайн Норчаев пен 86 минутта Абдуқодир Хусановтың соққан голдары Өзбекстан құрамасына жеңіс әкелді.

Осылайша Өзбекстанның Олимпиада құрамасы өзбек футболында тарих жазып, Париж-2024 Олимпиадасына жолдама жеңіп алды. Кападзе шәкірттері 3 мамыр күні финалда Ирак-Жапония кездесуінің жеңімпазымен ойнайды.

Өзбекстан президенті Шавкат Мирзиеев футболдан жастар құрамасын құттықтады.

Қымбатты балаларым! Сіздерді осы күндері футболдан жасөспірімдер арасындағы Қатарда өтіп жатқан Азия кубогына қатысып, финалға шыққандарыңызбен және жартылай финалда жеңіске жетіп, биыл жазда Парижде өтетін Олимпиялық ойындарға жолдама алуларыңызбен шын жүректен құттықтаймын!

Өзбекстанның футбол тарихындағы мұндай жарқын жеңісті еліміздің барша спортсүйер қауымы, барша көпұлтты халқымыз шексіз қуаныш, мақтанышпен қарсы алғаны сөзсіз. Өйткені бұл еліміздің көп жылғы ұлы арманы еді. Армандар орындалады. Осы жеңіс Жаңа Өзбекстанның перзенттеріне нәсіп етілді. Онымен қаншалықты мақтансаңыздар да жарасады. Әрине, бұл тарихи жеңістің шындап келгенде соңғы жылдары елімізде спорт саласын, оның ішінде футболды дамытуға зор көңіл бөлініп, атқарылған ауқымды тәжірибелік жұмыстармен байланысты болып отырғаны сөзсіз.

Сонымен қатар, жеңіс тәжірибелі бапкерлер мен сарапшылардың сіздер сияқты жігерлі жастарымызды жарысқа тыңғылықты дайындағанымен байланысты болса, екінші жағынан, әрбір ойында нағыз шеберлік, батылдық пен табандылық танытқандарыңыздың арқасында келіп отыр.

Азия құрлығының мықты командаларымен өткен 5 матчта құрамамыздың қақпасына гол салдырмай, қақпаның торына 14 жауапсыз допты тоғытқандарыңыз – футбол тарихындағы бұрын-соңды болмаған нәтиже. Бұл жетістікке жігерленіп, финалда «Азия чемпионы» деген құрметті атақ үшін лайықты ойын өрнегін көрсететіндеріңізге сенімдімін.

Осы сәтті пайдалана отырып, баршаңызға, аяулы ата-аналарыңызға, ұстаз-бапкерлеріңізге шын жүректен алғысымды білдіремін.

Барша Өзбекстан халқы сіздерге бақыт пен сәттілік, жарқын жеңістер тілейді, қымбатты балаларым! – деді ол.

3 мамырда Азия кубогы үшін финалдық жарыс өтеді. Енді грузиялық жаттықтырушы Темур Кападзенің ойнышылары финалда Ирак пен Жапония матчының жеңімпазымен күш сынасады.