Каппадокия – үңгір қонақүйлері, жерасты қалалары, ертегі мұнаралары және әуе шары турларымен әлемге әйгілі ерекше аймақ. 2024 жылы мұндағы мұражайлар мен археологиялық нысандар 4,37 миллионнан астам қонақ қабылдап, Түркияның басты мәдени орталықтарының біріне айналды. Ал әуе шары турларына 933 мың адам қатысып, тарихи рекорд орнатты.
Каппадокия тек көз тартар көріністерімен ғана емес, сонымен қатар бай гастрономиялық дәстүрімен де танымал. Түркі және Анадолы асханасының ең үздік дәмдері мұнда жергілікті өнімдермен үйлесіп, ерекше тағамдар қатарын құрайды. Жуырда бұл өңірдің асханасы MICHELIN Guide-тің назарына ілігіп, аймақтың гастрономиялық туризм әлеуетін арттыра түсті.
Дәмді тағамдар әлемі
Мұнда ең алдымен атақты тесті-кебабын татып көру керек. Сіздің көз алдыңызда қыздырылған саз құмыраны жарып, ішінде бірнеше сағат бойы баяу піскен ет тағамын ұсынған сәт – нағыз гастрономиялық шоу. Сондай-ақ, тандырда дайындалған ет тағамдары да ерекше дәмімен есте қалады.
Аймақтың тағы бір аңызы – Кайсеридің мәнтісі. Өте ұсақ дайындалған бұл түймешіктердің қырық данасы бір қасыққа сияды. Үстіне йогурт пен дәмдеуіш қосылған май құйылып, ерекше дәм береді.
Жергілікті ас мәзірінде Үргүп тарханасы, тандыр сорпасы, кептірілген өрікпен әзірленетін қайсы яхнисі, жүзім шәрбаты қосылған зерделі палау, ет пен жаңғақ салынған айвалы долма, және ақ бұршақтан жасалған ағпақла сияқты тағамдар бар. Тәттіге құмар жандар үшін – майда қуырылған інжір, асқабақ десерті, жүзім қосылған көфтүр, балмен бірге берілетін кепкен қаймақ, долаз және, әрине, әйгілі Дамат пахлавасы ұсынылады.
Каппадокияда шарап жасау дәстүрі алғашқы христиан монахтары заманынан бастау алады. Күн мол түсетін және жанартау топырағы бай бұл өлкеде Өкүзгөзі, Калежик қарасы, Боазкере, Наринже жүзім сорттары, сондай-ақ өңірдің басты мақтанышы – минералды дәмі бар Эмир ақ шарабы өндіріледі.
Каппадокия – таңғажайып көріністер, бірегей асхана және мыңжылдық тарих тоғысқан мекен. Мұнда келген әрбір қонақ тек әуе шарына мінумен шектелмей, мәдениет пен дәм саяхатына шығады.
