Қазіргі қарбалас заманда су маңында уақыт өткізудің адам жанына ем екені және ішкі тепе-теңдікті қалпына келтіруге көмектесетіні ғылыми тұрғыдан дәлелденген. Соңғы жылдары әлемдік трендке айналған «Blue Mind» (Көгілдір сана) тұжырымдамасы да дәл осы феноменді меңзейді.
Бүгінгі таңда саналы саяхатшылар тек бір орында, қонақүй маңында жататын үйреншікті жағажай демалысынан бірте-бірте бас тартып жатыр. Оның орнына адамдар теңіздің нағыз еркіндігін сезінуді, су үстінде белсенді болуды, қол тимеген табиғат аясында тыныстап, шынайы тарихпен қауышуды қалайды. Дәстүрлі ағаш кемелермен толқын үстінде тербеліп, күнделікті күйбең тіршілікті ұмытқысы келетіндер үшін Түркия жағалауларындағы ең ерекше 5 дестинацияны ұсынамыз.
1. Чешме және Алачаты
Теңізде Ілыджа, Аяйорги шығанақтары мен Ешек аралының маңында зәкір тастап, ашық теңізде шомылуға болады, сонымен қатар әлемдік виндсерфинг орталығы саналатын Алачатыда толқынмен жарысу мүмкіндігі бар. Жағалауда болса сапарды Урла аймағында аяқтаған жөн, өйткені мұндағы атақты мейрамханалар органикалық өнімдерден, балғын теңіз өнімдері мен Эгей шөптерінен дайындалған бірегей мәзірлер ұсынады.
2. Бодрум және Гөкова шығанағы
Теңізде Гүмішлүк, Битез және Орак аралының бирюза түсті суларында жүзіп, ары қарай Гөкова шығанағының жасырын жауһарлары — Маден қойнауы мен Ағылшын портына бағыт алуға болады. Жағалауда болса Бодрум бекінісіндегі Суасты археология мұражайын аралауға және әлемнің көне жеті кереметінің бірі — Галикарнас кесенесінің қалдықтарын тамашалауға мүмкіндік бар.
3. Датча және Мармарис
Теңізде Паламутбүкү, Хайытбүкү және Аквариум шығанағының кәусар суында дайвингпен айналысып, Мармариске қарай бет алуға және Кумлубүк пен Седир аралының сұлулығына куә болуға болады. Жағалауда көне Книдос қаласының қирандыларын аралап, Афродита храмы мен теңізге қарайтын ежелгі театрдан күннің батқанын тамашалау ерекше әсер сыйлайды.
4. Гөчек және Фетхие
Теңізде Яссыджа аралдары мен Бедри Рахми шығанағында серуендеп, ең басты ерекшелік — «Клеопатра моншасының» су астында қалған ежелгі қирандыларының арасында шомылуға болады. Жағалауда Дальян кентіндегі жартасқа қашалған Каунос қабірлерін көруге, Caretta caretta тасбақалары мекендейтін Изтузу жағажайына баруға немесе Фетхиеде әйгілі Өлітеңіз лагунасының үстінен парапланмен ұшуға мүмкіндік бар.
5. Қаш және Кекова
Теңізде Лиманағзы мен Аперлаи шығанақтары арқылы өтіп, әлемдегі ең үздік дайвинг орталықтарының бірі саналатын Қаш маңындағы маржан рифтері мен суға батқан кемелерді зерттеуге болады. Жағалауда болса Кековадағы су астында қалған көне қаланың үстімен теңіз каягымен серуендеп, саяхатты Aspendos театры мен Патара тарихи мекенін аралаумен қорытындылаған жөн.
Қорытындылай келе, жазғы демалысты тек бір қонақүй мен үйреншікті жағажайдың айналасында өткізу уақытты шектеумен тең. Теңіздің шынайы еркіндігін сезініп, тарих пен табиғаттың үндескен сәттеріне куә болу үшін балама бағыттарды зерттеу — тән мен жанның толықтай қайта түлеуіне (перезагрузка) мүмкіндік береді. Өзіңізге ұнаған маршрутты таңдап, су үстіндегі жаңа шытырман оқиғаларға жол тартыңыз. Саяхатыңыз сәтті өтсін!
