2024 жылы қазақстандық мұнайды Баку-Тбилиси-Джейхан арқылы жылына 1,5 млн тонна көлемінде жеткізу жоспарланған
ҚР энергетика министрі Алмасадам Сәтқалиев Қазақстан Республикасы мен Әзербайжан Республикасы арасындағы сауда-экономикалық ынтымақтастық жөніндегі бірлескен үкіметаралық комиссияның 20-шы отырысының қорытындысы бойынша Әзербайжанның энергетика министрі Парвиз Шахбазовпен кездесті, деп хабарлайды ведомствоның баспасөз қызметі.
![](https://turanews.kz/wp-content/uploads/2023/04/petrol-boru-hatti-780x470.jpg)
Тараптар елдердің энергетика, қазақстандық мұнай транзиті, жаңартылатын энергия көздерінің ауқымды жобаларын іске асыру саласындағы ынтымақтастығына қатысты бірқатар мәселелерді талқылады.
2022 жылдың қараша айында «ҚазМұнайГаз» (ҚМГ) және SOCAR компаниялары арасында Ақтау-Баку-Тбилиси-Джейхан бағыты бойынша мұнай транзиті туралы келісімге қол қойылды. 2023 жылдың қорытындысы бойынша Ақтау портынан мұнай жөнелту Баку-Тбилиси-Джейхан бағытында 1 057 мың тоннаны құрады. 2024 жылға қазақстандық мұнайды БТД арқылы жылына 1,5 млн тонна көлемінде жеткізу жоспарланған.
![](https://turanews.kz/wp-content/uploads/2024/03/kz-az-transcaspian2.jpg)
«Біздің Ұлттық компанияларымыздың алдына Қазақстанда өндірістің өсуін ескере отырып, мұнай жеткізу көлемін ұлғайту міндеті қойылды. Осыған байланысты, қазақстандық мұнайды жеткізу көлемін ұлғайтуды жоспарлап отырмыз», – деп атап өтті А.Сәтқалиев.
Энергетика министрлігінің басшылары Каспий теңізінің түбіне терең су кабелін төсеу арқылы Кавказ өңірі мен Орталық Азияның энергия жүйелерін қосуға бағытталған жобаны іске асыру бойынша алдағы жұмыстарды талқылады.