ШҚО-да «Цифрландыру дәуіріндегі мемлекеттік басқару: өңірлік аспект» атты халықаралық ғылыми-практикалық конференция өтті

Шығыс Қазақстан облысында Мемлекеттік қызметші күніне орай «Цифрландыру дәуіріндегі мемлекеттік басқару: өңірлік аспект» атты халықаралық ғылыми-практикалық конференция өтті. Іс-шараға мемлекеттік органдардың өкілдері, Қазақстанның сарапшылар қауымдастығы, сондай-ақ Қырғызстан мен Әзербайжаннан келген мамандар қатысты.

Қатысушылар өңірлерді цифрлық трансформациялау, мемлекеттік органдардың жұмысына заманауи технологиялар мен жасанды интеллектті енгізу мәселелерін талқылады. Қырғызстан өкілдері ведомствоаралық электрондық өзара іс-қимылды қамтамасыз ететін және мемлекеттік қызметтерді онлайн форматта көрсетуге мүмкіндік беретін «Тундук» цифрлық платформасын пайдалану тәжірибесімен бөлісті.

Конференция аясында мемлекеттік басқару жүйесін жетілдіруге бағытталған жас мемлекеттік қызметшілердің жобалары таныстырылды. Солардың ішінде мемлекеттік қызметке жаңадан келген мамандардың бейімделуіне көмектесетін, тәлімгерлерден кеңес алып, тәжірибелік оқудан өтуге мүмкіндік беретін «Smart Mentor» платформасы ерекше қызығушылық тудырды.