Каппадокияда әлем спортшылары қайта бас қосады
Әлемге әйгілі «пері мұржалары» мен вулкандық жоталарымен танымал Каппадокия — тек табиғи ғажайыптар мекені емес, сонымен қатар спорт пен шытырман оқиғаларға толы аймақ. 2025 жылдың 17–19 қазаны аралығында мұнда Түркияның ең беделді спорттық шараларының бірі – 12-ші Salomon Cappadocia Ultra-Trail өтеді.
Халықаралық ультрамарафон Түркия Жастар және спорт министрлігі, TGA (Түркия туризм таныту және дамыту агенттігі), Түркия жеңіл атлетика федерациясы және жергілікті әкімдіктердің қолдауымен ұйымдастырылуда. Жарыс спорттық туризмді дамытып қана қоймай, Каппадокияның ғажайып табиғатын әлемге паш етеді.
Salomon Cappadocia Ultra-Trail – жыл сайын өтетін халықаралық спорт мерекесіне айналған жарыс. Биылғы бағдарлама төрт түрлі бағыттан тұрады:
- Cappadocia MINI Trail (CMIT) – жаңадан бастаушыларға арналған 14 км жол, биіктік айырмасы 308 м. (17 қазан, 15:00)
- Cappadocia Short Trail (CST) – 38 км, 1120 м биіктік айырмасымен, Каппадокия аңғарларының көркін ашатын бағыт. (18 қазан, 10:00)
- Cappadocia Medium Trail (CMT) – орташа деңгейлі 63 км жол, 2030 м биіктік айырмасымен. (18 қазан, 07:00)
- Cappadocia Ultra-Trail (CUT) – жарыстың ең беделді кезеңі: 119 км, 3730 м биіктік айырмасымен, шынайы төзімділікті сынайтын бағыт. (18 қазан, 07:00)
Биыл жарысқа жаңа форматтағы Cappadocia Team Games командалық сындары да енгізілген: CUT 119K (2 адамдық), CMT 63K (6 адамдық, оның кемінде екеуі әйелдер), CST 38K (3 адамдық, кемінде бір әйел). Жеңімпаздар 19 қазандағы марапаттау рәсімінде анықталады.
Salomon Cappadocia Ultra-Trail – жай ғана жарыс емес, Каппадокияның мәдени және табиғи байлығын әлемге танытатын ірі халықаралық іс-шара. Әр жылы 75-тен астам елден мыңдаған спортшылар мен туристер келіп, аймақтың экономикалық және туристік өмірін жандандырады.
Каппадокияның ерекше бедері, көк аспанды көмкерген аэростаттық ұшулар, жерасты қалалары, жартастан қашалған шіркеулер, және тас үңгір қонақүйлерінде түнеу сынды тәжірибелер бұл өңірді нағыз сиқырлы мекенге айналдырады. Аймақтың жергілікті тағамдары мен шараптары да ерекше танымал, ал соңғы уақытта Каппадокия MICHELIN Guide Türkiye картасына енгізіліп, гастрономиялық туризмнің де жаңа бағытына айналды.
Қазіргі таңда Каппадокия қазақстандық туристердің де сүйікті бағыттарының бірі. Әсіресе, ауа шарымен таңғы ұшу немесе жергілікті қыш шеберханаларында қолөнер жасау – саяхатшылар үшін ұмытылмас әсер қалдырады.
