Мұнда 40 000-ға жуық үңгір бар, олардың әрқайсысы өзінің ерекшелігімен таң қалдырады. Жерасты көлдері, сталактиттер мен сталагмиттерге толы бұл ғажайып табиғи құрылымдарды зерттеу – ең қызықты оқиғалардың бірі. Бұл жұмбақ жер асты әлеміне енгенде, өзіңді фантастикалық фильмнің декорациясында жүргендей сезінбеу мүмкін емес. Назарларыңызға Түркиядағы ең көрікті алты үңгірді ұсынамыз.
Алтынбешік үңгірі – ең үлкен жерасты көлі
Түрік Ривьерасының жүрегі саналатын Анталияда көптеген тарихи үңгірлер бар. Олардың ішінде Алтынбешік үңгірі, Үрүнлі ауылында орналасқан, әлемге танымал алғашқы үңгір. Бұл үш деңгейлі табиғи ғажайыпта Түркиядағы ең үлкен және әлемде көлемі бойынша үшінші орындағы жерасты көлі бар. Қайықпен саяхаттау арқылы үңгірдің кіреберісін зерттеуге болады. Ол жасыл қарағайлы ормандар арасында оазис тәрізді көрінеді. Бірінші деңгейдің соңында 44 метрлік травертин жартасы көз тартады. Кәсіби үңгір зерттеушілері арнайы құрал-жабдықтың көмегімен екінші деңгейге көтеріліп, көлдерге толы кеңістікті тамашалай алады. Ал жоғарғы қабатта үлкен жартастар орналасқан.
Дамлаташ үңгірі – сталактиттер әлемі
Анталияның Аланья ауданында орналасқан Дамлаташ үңгірі – Түркияда үңгір туризмі туралы айтылғанда ең алғаш еске түсетін орындардың бірі. Үңгір тамшы тәрізді сталактиттерімен ерекше. 50 метрлік дәлізден өтіп, цилиндр тәрізді ойық арқылы негізгі кеңістікке кіруге болады. Үңгірдің ауасы демікпе (астма) ауруына оң әсер етеді деп саналады. Сондықтан кейбір науқастар дәрігер бақылауымен 21 күн бойы осында ем қабылдайды.
Караин үңгірі – палеолит дәуірінің орталығы
Анталия провинциясында орналасқан Караин үңгірі – табиғи әрі тарихи маңызы зор орын. Бұл үңгір Палеолит дәуірінен бастап Рим кезеңіне дейінгі адамзат тіршілігінің іздерін сақтаған Түркиядағы ең үлкен үңгір болып саналады. Мұнда табылған кейбір жәдігерлер Анадолыда жасалған ең көне адам қолөнері деп есептеледі. Караин үңгірі ЮНЕСКО-ның мұра тізіміне енгізілген.
Баллыжа үңгірі – емдік қасиеті бар табиғи мұра
Қаратеңіз аймағындағы Токат провинциясында орналасқан Баллыжа үңгірі шамамен 3,5 миллион жылдық тарихы бар. Оның геологиялық құрылымы әлемдік деңгейде ерекше болып саналады. Мұнда түрлі сталактиттер, сталагмиттер, драпир тас түзілімдері, тамшы тасты бассейндер және пияз тәрізді сталактиттер кездеседі. 2019 жылы ЮНЕСКО-ның мұра тізіміне енгізілген бұл үңгір құрамында шаң мен тозаң болмайтын, теріс иондарға бай ауасымен демікпе және тыныс алу жолдары ауруларына ем ретінде қолданылады.
Каража үңгірі – Гүмүшханенің жерасты сарайы
Түркияның шығыс Қаратеңіз аймағындағы Гүмүшхане провинциясында орналасқан Каража үңгірі табиғаттың ғажайып туындысы. Мұнда сталактиттер, сталагмиттер, тас бассейндер, үңгір гүлдері, үңгір маржандары және ерекше түсті жартас түзілімдері бар. Әктас жыныстарында пайда болған бұл үңгір төрт негізгі залдан тұрады, ал су ағымдары мен минералдардың әсерінен екі зал қосымша бөлініп, жалпы саны алты залға жеткен.
Дупниса – Фракияның әйгілі үңгір жүйесі
Дупниса үңгірі – Түркияның Фракия аймағындағы Киркларели провинциясында, Демиркөй ауданында жасырынған табиғи қазына. Фракиядағы алғашқы және жалғыз туристік үңгір жыл сайын ондаған мың қонақты қарсы алады. Төрт миллион жыл бойы қалыптасқан бұл үңгір екі қабатты құрылымнан және бір-бірімен байланысқан үш үңгірден тұрады. Жоғарғы қабатта Куру және Кыз үңгірлері орналасқан, ал төменгі қабатта Сулу үңгірі бар. Дупниса үңгірінде ақшыл-сүттен қызыл және қоңыр түстерге дейінгі сталактиттер, сталагмиттер, бағаналар, тамшы тастар және алып тасты бассейндер кездеседі. Сонымен қатар, бұл үңгір 11 түрлі жарқанат түрінің мекені болғандықтан, олардың көбею кезеңінде 15 қараша мен 15 мамыр аралығында кейбір аймақтары жабық болады.
Түркиядағы бұл керемет үңгірлер табиғаттың таңғажайып сұлулығын тамашалауға және ерекше тәжірибе алуға мүмкіндік береді.
