Sud qarori Telegram politsiyaga Arakruz maktabidagi hujumga aloqador bo’lishi mumkin bo’lgan neonatsist guruhlar ma’murlari haqidagi ma’lumotlarni topshirishdan bosh tortganidan so’ng qabul qilindi.
Braziliya sudi Telegram messenjerining mamlakatdagi ishini to’xtatishga qaror qildi va politsiya tomonidan so’ralgan ma’lumotlarni taqdim etishdan bosh tortgani uchun jarima miqdorini kuniga 1 million realga (taxminan 198 ming dollar) oshirdi.
Ma’lum qilinishicha, sud qarori politsiyaning Telegramdan Arakruz maktabidagi to’rt kishining o’limiga sabab bo’lgan hujumga aloqador bo’lishi mumkin bo’lgan neonatsist guruhlar ma’murlari va a’zolari haqidagi ma’lumotlarni topshirishni talab qilganidan keyin qabul qilingan. Politsiya 16 yoshli otishmachi Telegramda portlovchi qurilmalar yasash bo’yicha o’quv materiallari aks etgan videolarni chop etuvchi va neonatsistlar g’oyalarini targ’ib qiluvchi antisemit guruhlar bilan muloqot qilganini aniqlagan.
Braziliya adliya vaziri Flavio Dinoning so’zlariga ko’ra, politsiya tekshiruvlari natijasida San-Paulu va Goyas shaharlarida joylashgan o’smirlarni maktabdagi zo’ravonliklarga jalb qilgan antisemit Telegram guruhlari ham fosh etilgan.
O’tgan yilning mart oyida Braziliya Oliy sudi ham Telegramni bloklashga qaror qilgan edi. Sud bu qarorni Telegram yolg’on ma’lumot tarqatuvchi profillarni bloklash talabini e’tiborsiz qoldirganidan so’ng qabul qilgan, deyiladi uzreport.news saytida.
