«Заң және тәртіп» рухындағы викториналар мен квесттер: Өскемен мектептерінде полицейлер профилактикалық жұмыстар жүргізуде

21 қаңтар күні облыс бойынша барлық білім беру ұйымдарында «Заң және тәртіп» идеологемасы аясында құқық қорғау органдары өкілдерінің қатысуымен құқықтық қонақжай форматындағы Бірыңғай сынып сағаты өтті.

Өскемен қаласының білім бөлімі хабарлағандай, бұл бастама өскелең ұрпақтың бойында заң қағидаттарын, жеке жауапкершілік пен қоғамдық тәртіпті терең түсінуге бағытталған.
Оқушылар үшін жағдаяттық тапсырмаларды шешуге арналған викториналар, құқықтық квесттер, дәрістер мен рөлдік ойындар ұйымдастырылып, олар құқықтық сауаттылықты арттыруға және заңға құрметпен қарауды қалыптастыруға ықпал етті.

9-сынып оқушыларымен кәмелетке толмағандардың қылмыстық жауапкершілігі, сыбайлас жемқорлық тәуекелдері, құқыққа қарсы әрекеттерге делдал болу, кибербуллинг пен цифрлық алаяқтық мәселелері талқыланды. Бұл тақырыптар «Заң және тәртіп» күн тәртібіне тікелей қатысты өзекті мәселелер болып табылады.

Ал 10–11 сынып оқушыларына құқық қорғау органдарының қызметкерлері 18 жастан бастап туындайтын қылмыстық жауапкершілік тетіктерін түсіндіріп, сондай-ақ әкімшілік жауапкершілік, киберкеңістіктегі қауіп-қатерлер мен сыбайлас жемқорлық тәуекелдері жөнінде мәлімет берді.
Сонымен қатар 5 және 8 сыныптарда полицейлер ерте жастан құқықтық сана мен заң мен тәртіпті сақтау мәдениетін қалыптастыруға бағытталған профилактикалық әңгімелер өткізді.

Жалпы іс-шараларға 60 мыңнан астам оқушы мен педагог, сондай-ақ 54 құқық қорғау органы қызметкері қатысты, — деп атап өтті қалалық білім бөлімінде.