Анкарада ТҮРКСОЙ Бас хатшылығында әзербайжандық ғалым, профессор Элман Гулиевтің «Түркі халықтары әдебиеті» атты еңбегінің тұсаукесері өтті. Шараға ТҮРКСОЙ Бас хатшысы Сұлтан Раев, әдебиеттанушылар, жазушылар, дипломаттар және түркі елдерінен келген қонақтар қатысты.
Профессор Гулиевтің көпжылдық ғылыми зерттеуіне негізделген шығарылымы түркітілдес халықтардың ортақ әдеби мұрасын жүйелі түрде қамтиды. Еңбекте Орхон жазбаларынан бастап Анадолы, Әзербайжан, Түркістан, Кавказ және Еділ-Орал кеңістігіндегі әдеби дәстүрдің дамуы қарастырылған. Юнус Эмре, Физули, Низами, Алишер Науаи, Абай, Шыңғыс Айтматов сияқты қайраткерлердің шығармашылық байланыстары салыстырмалы түрде талданады.
Сұлтан Раев өз сөзінде еңбектің түркі халықтары арасындағы мәдени тұтастықты көрсетуге қосқан үлесін атап өтті. Ал профессор Шүкрі Халук Акалын кітаптың жариялануы ЮНЕСКО бекіткен «Түркі тілдері отбасы күні» және 2026 жылы Бакуде өтетін Түркологиялық құрылтайдың 100 жылдығымен тұспа-тұс келгенін айтты.
Таныстырылымнан кейін өткен панельдік талқылауда академиялық және мәдени тұрғыдағы пікірлер ортаға салынды. Профессор Гулиев бұл еңбектің түркі әлемі әдебиетін біртұтас қарастыруға мүмкіндік беретініне сенім білдірді.
Шара соңында ғалымға түркі мәдениетіне қосқан еңбегі үшін ТҮРКСОЙ медалі табысталды.
