Түркиялық ғалым мен Батыс Қазақстан университетінің өкілдері түркі әлемі әдебиеті төңірегінде сұхбаттасты

Түркі дүниесінің рухани тұтастығы мен мәдени сабақтастығын нығайту мақсатында Орал қаласындағы Батыс Қазақстан университетінің филология факультеті мен түркиялық белгілі ғалым, аудармашы Ашур Өздемир арасында мазмұнды әдеби сұхбат өтті.

Жиын барысында филология ғылымдарының кандидаты Рита Сұлтанғалиева бастаған оқытушылар құрамы мен жас зерттеушілер Анадолы мен Арқа арасындағы рухани алтын көпірдің бүгінгі жай-күйін талқылады. Түркиядан келген қадірлі мейман өзінің ғылыми жолы мен аудармашылық тәжірибесі туралы емен-жарқын сыр шертіп, студенттер мен магистранттардың көкейіндегі сауалдарына жауап берді.

Ашур Өздемирдің шығармашылық тағдыры 1990-жылдардан бастап күллі түркі жұртының қара шаңырағы — Түркістан топырағымен тығыз астарласып жатыр. Ол ұзақ жылдар бойы қазақ тілінің құдіретін зерттеп, бауырлас елдің сөз өнерін Анадолы оқырманына таныстыруға өлшеусіз үлес қосып келеді. Ғалымның қазақ әдебиетінің жауһарларын түрік тіліне тәржімалаудағы еңбегі ерекше атап өтуге лайық.

Атап айтқанда, Абай Құнанбайұлының «Қара сөздері», Міржақып Дулатов пен Сұлтанмахмұт Торайғыровтың классикалық мұралары, сондай-ақ Оралхан Бөкей, Шерхан Мұртаза және Дулат Исабеков сынды проза шеберлерінің туындылары Ашур Өздемирдің қаламы арқылы түрік тілінде сөйледі. Бұл еңбектер тек қазақ руханиятын ғана емес, жалпы түркі әлемінің көркемдік қуатын халықаралық деңгейде паш етуге қызмет етіп отыр.

Кездесу соңында қатысушылар ортақ мәдениетті ұлықтап, әдебиет арқылы халықтар достығын нығайтып жүрген ғалымдар мен аудармашылардың еңбегіне жоғары баға берді. Мұндай еркін форматтағы сұхбаттар түркі тілдес елдердің ғылыми-мәдени ықпалдастығын арттырып, ортақ құндылықтарды келесі ұрпаққа жеткізуде зор маңызға ие.