Дүниежүзілік туризмде жаңа тренд қалыптасып келеді: ол — «ноктүризм», яғни, түнде саяхаттау. Жұмсақ климаты мен ұзақ жазы бар Түркия бұл санаттағы саяхаттар үшін ең тамаша бағыт болып саналады. Қыркүйек пен қазан айларына дейін жалғасатын жылы кештерде келушілер осы сүйкімді елдің әр түкпіріндегі түрлі түнгі тәжірибелерді тамашалай алады.
«Night Museums» жобасы арқылы Түркияның ең маңызды мәдени мұра нысандары – Эфес (Измир), Иераполис-Памуккале (Денизли) және басқа да тарихи орындар кешке дейін келушілерге есігін айқара ашады. Өткен жылы бұл жобаға 395 мыңнан астам турист қатысқан.
Ыстанбұл: Музыка, Босфор және түнгі өмір
Түнде Ыстанбұл жаңа қырынан ашылады. Археологиялық мұражайлар мен Галата мұнарасы кешкісін жұмыс істеп, туристерге ерекше мәдени саяхат ұсынады. Қалада халықаралық жұлдыздардың ашық аспан астындағы концерттері, түнгі кино көрсетілімдері және дәстүрлі түрік мейханелерінде қонақжай дастарқандар бар. Ең әсерлілерінің бірі – Босфордағы кешкі кеме серуендері, мұнда қаланың жарық шамдары су бетінде айнадай шағылысады.
Эгей аймағы: Измир мен Мугла
Эгей жағалауында кешкісін мәдениет пен гастрономия қатар өрбиді. Измирдегі Урла өңірінде жергілікті шараптар мен теңіз өнімдері ұсынылып, MICHELIN гидінде танылған мейрамханалар қонақтарға ерекше ас мәзірін ұсынады. Ал Мугладағы Бодрум – суасты археологиясы мұражайымен танымал. Фетхие мен Мармаристе ай жарығымен теңіз серуендері мен түнгі сүңгу турлары ұйымдастырылады.
Анталия: Жұлдыз астындағы қойылымдар
Жерорта теңізінің інжу-маржаны Анталия күн батқанда да қызу өмірімен танымал. Антикалық Аспендос театрында опера мен балет фестивальдері өтсе, мұражайлар түнгі 10-ға дейін жұмыс істейді. Каш курортындағы түнгі дайвинг әлемнің үздік тәжірибелерінің қатарына енген. Ал Белектегі жарықтандырылған гольф алаңдары саяхатшыларға жұлдыз астында гольф ойнау мүмкіндігін сыйлайды.
Каппадокия: Таң алдындағы әуе балеті
Каппадокиядағы жерасты қалалары (Деринкую, Каймаклы, Өзконак) кешкі тоғызға дейін ашық болады. Жұлдызды аспан астында серуендеу мен дәстүрлі үңгір қонақүйлерінде қонақ болу – шынайы каппадокиялық тәжірибе. Бірақ ең басты сәт таң алдында басталады: ондаған әуе шарлары көкке көтеріліп, қия-қалалардың үстінде әуедегі «балетке» айналады. Бұл – қараңғылықтан жарыққа өтуді көз алдыңда бейнелейтін ұмытылмас көрініс.
