Чанаккале – тек түрлі-түсті теңіз тіршілігімен ғана емес, Бірінші дүниежүзілік соғыстан қалған тарихи кемелердің қаңқаларымен де әйгілі әлемдік сүңгу бағыттарының бірі.
Бұл құнды мұралардың орталығы – Галлиполи тарихи су асты паркі. Бір ғасыр бұрынғы қақтығыстардың үнсіз куәгерлері бүгінде теңіз флорасы мен фаунасына айналып, табиғат пен тарихтың ерекше үйлесімін көрсетуде. 2025 жылы осы мұраны әлемге паш ететін ауқымды шара өтпек.
Тарих толқынында
Gallipoli Wreck Fest – Халықаралық су асты фотосурет байқауы 2025 жылдың 29 тамызы мен 7 қыркүйегі аралығында Галлиполи тарихи су асты паркінде өтеді. Әлемге танымал су асты фотографтары мен видеооператорлары Чанаккалеге жиналып, теңіз түбіндегі тарихи кемелерді түсіріп, өңірдің дайвинг туризмін жаңа деңгейге көтермек.
Байқау сапары 29 тамызда Стамбулда басталып, 30 тамызда қатысушылар Седдүлбахир қамалындағы салтанатты ашылу рәсіміне қатысады. 31 тамыз бен 3 қыркүйек аралығында сүңгу жұмыстары жүргізіліп, фотографтар мен видеооператорлар Бірінші дүниежүзілік соғыс кемелерін су астында түсіреді. 4 қыркүйекте фотоөңдеу және саяхат бағдарламасы өтеді, соңғы жұмыстар қабылданады. Ал 5 қыркүйекте қазылар алқасы жеңімпаздарды анықтап, марапаттау рәсімі өтеді. Соңғы күндері қатысушылар Стамбулға оралады.
Су астындағы өнер мен мұра
Байқауда түсірілген суреттер мен бейнематериалдар тек өнер туындысы емес, Чанаккаленің тарихи жадына арналған визуалды әңгіме болмақ. Олар әскери тарихты, теңіз мұрасын және мәдени естеліктерді жаңа қырынан ашып көрсетеді.
Осылайша, Gallipoli Wreck Fest 2025 Чанаккаленің су асты байлығын әлемге танытып қана қоймай, мұраны қорғаудың заманауи тәсіліне айналып, өңірдің халықаралық деңгейдегі ең тартымды сүңгу орталықтарының бірі ретінде беделін арттыра түспек.
