Вашингтон қаласындағы Азия өнерінің Ұлттық мұражайында қазақ қолөнерінің дәстүрлерін көрсететін отандық үш шебердің ұлттық киімдер топтамасы ұсынылды, деп ҚазАқпарат агенттігіне сілтемелеп Turanews.kz жазады.
«Тәңірдің жаны» сән көрсетілімін Смитсондық қолөнершілер бастамасы, Қазақстан қолөнершілер одағы және Chevron компаниясы ұйымдастырды.
Қазақстандық дизайнерлер қазақ тоқыма және зергерлік өнерінің бай палитрасын ұсынды.
Айжан Бекқұлованың топтамасында түркі халықтарының қолдан жасалған киімдері ұсынылды. Қазақстанның оңтүстік-шығыс бөлігінен табылған жартастағы бейнелер – петроглифтер негізінде жүннен жасалған және күнбағыс құдайларының пішініне ие бас киімдер қызығушылық тудырды.
Айжан Сембіғалиева Маңғыстау облысының табиғаты мен ұлттық қорықтарынан шабыт алып, өз топтамасын осы аймақ және оның тоқыма дәстүрлеріне арнады.
Тілек Сұлтан ата-бабалар киген киімінен шабыт алды. Ол өз топтамасы үшін түрлі костюмдер, зергерлік бұйымдар мен түстер палитрасы бойынша ерекшеленетін қазақ тайпаларының дәстүрлі киімдерін зерттеді.
2012 жылдың сәуір айында құрылған Қазақстан қолөнершілер одағы дәстүрлі өнерді сақтау және насихаттау миссиясын атқарады.
Материалдық емес мәдени мұраны қорғау үшін маңызды мәнге ие одақ қолөнершілердің кәсіби өсуін және Қазақстандағы креативті индустрияны дамытуды арттыруға ұмтылады. Олардың «Қазақстандағы дәстүрлі қолөнерді жаңғырту, сақтау, қолдау және дамыту» флагмандық жобасы Chevron, ЮНЕСКО және Қазақстан Мәдениет министрлігінен демеушілік көмек алады.
2020 жылы Смитсондық фольклор және мәдени мұра орталығының қолөнершілер бастамасы тәжірибе алмасу үшін бірдей қолөнер дәстүрлерін ұстанатын қазақстандық және америкалық суретшілерді біріктіру үшін Қазақстан қолөнершілер одағымен, Chevron компаниясымен және АҚШ Мемлекеттік департаментімен серіктестік құрды.
