Сирияның қираған бөлігін кім қалпына келтіреді?
Түрік құрылыс компанияларының, соның ішінде цемент және болат компанияларының акциялары қор нарықтарында күшті өсім көрсетті. Сарапшылар бұл кәсіпорындардың Башар Асад режимі құлағаннан кейін Сирияны қалпына келтіруде шешуші рөл атқарады деп түсіндіреді. https://kaz.inform.kz/news/siriyanin-kiragan-bolgn-km-kalpina-keltred-368699/
Соңғы аптада ірі инвесторлардың назары Түркияның құрылыс секторына ауды. Себебі елдегі цемент, металл конструкциялары және басқа да құрылыс өнімдерін өндірумен айналысатын компаниялар перспективалы инвестициялық мақсатқа айналды. Бұл қызығушылықтың бір себебі алдағы Сириядағы ауқымды қалпына келтіру жұмыстары, деп жазады Kazinform агенттігі.
Түрік құрылыс секторы жоғары даму деңгейімен және халықаралық жобаларға белсенді қатысуымен танымал. Сирияға географиялық жақындығы, дамыған көлік инфрақұрылымы және қайта құру жобаларындағы тәжірибесі Түркияға артықшылық береді. Соңғы жылдары түрік компаниялары Ирак, Ливия, Ауғанстан және Украина сияқты елдерде белсенділік танытып, қиындықтарға төтеп беру қабілетін көрсетті.
Түркияның құрылыс нарығындағы ең ірі ойыншылар
«Çimsa Çimento Sanayi ve Ticaret A.Ş.» Түркиядағы жетекші цемент өндірушілердің бірі. Компания өз өнімдерін ондаған елдерге экспорттайды және ірі инфрақұрылымдық жобаларға сұранысқа ие цемент өндіруге маманданған. «Çimsa» Иракта және Таяу Шығыс аймағындағы басқа елдерде қалпына келтіру жұмыстарына қатысты. Компания Ирак, Ливия және Солтүстік Африкадағы инфрақұрылымдық жобаларды қоса алғанда, 60-тан астам елге өнімдерін экспорттайды. Цемент экспортының жалпы көлемі жылына 6-8 миллион тоннаны құрайды.
«Erdemir Group («Ereğli Demir ve Çelik Fabrikaları T.A.Ş.») Түркиядағы ең ірі болат өндіруші компания. Erdemir Group дамыған логистикалық инфрақұрылымға және көпірлерді, ғимараттарды және басқа да ірі нысандарды салу үшін қажетті прокат өндірісіне ие. «Erdemir» Ирак, Сирия, Ливия және Парсы шығанағы елдеріндегі ірі жобаларға белсенді түрде қатысады. Мысалы, 2022 жылы компания 7 миллион тоннадан астам болат экспорттады, оның басым бөлігі халықаралық құрылыс жобаларында пайдаланылды.
Akçansa Çimento – неміс HeidelbergCement компаниясының бірлескен кәсіпорны. Компания Түркиядағы цемент нарығында көшбасшы және көрші елдерде өз қызметтерін белсенді түрде ілгерілетуде. Akçansa Çimento халықаралық жобалар үшін артықшылық болуы мүмкін жоғары экологиялық өндіріс стандарттарымен танымал. Түрік мердігерлер одағының мәліметінше, компания Ирак, Сауд Арабиясы және Египеттегі ірі жобаларға белсенді цемент жеткізуші. Ливияда Akçansa Çimento 500 км-ден астам жол инфрақұрылымын қалпына келтіруге қатысты.
Түрік үкіметі халықаралық жобаларға қатысу үшін жеңілдіктер мен субсидиялар беру арқылы осы кәсіпорындардың барлығына қолдау көрсетеді. Сирия жағдайында түрік мердігерлеріне қалпына келтіру жұмыстарына қатысуға басым құқық беретін екіжақты келісімдер де болуы мүмкін.
Сарапшылардың пікірінше, алдағы айларда цемент пен болатқа сұраныс артады, өйткені Сирияның қираған инфрақұрылымы тез арада қалпына келтіруді қажет етеді.
Сондықтан Түркия аймақтағы өз мүддесін, соның ішінде құрылыс жобаларына қатысуды белсенді түрде алға жылжытға тырысады. Бұл оның экономикалық ықпалын күшейтіп қана қоймай, Түркияның өзінде қосымша жұмыс орындарын ашады, бұл елдің ішкі экономикасы үшін маңызды.
