ШҚО туризмі: 2024 жылдың қорытындылары шығарылып, жаңа мақсаттар айқындалды

2024 жылдың қорытындысы бойынша өңірге шамамен 428 мың адам келген, оның 410 мыңы — ішкі туристер. Шетелдік қонақтар саны 18 мыңға жетті. Бұл туралы ШҚО Кәсіпкерлік және индустриялық-инновациялық даму басқармасы басшысының орынбасары Досжан Болатбек Өңірлік коммуникациялар қызметі алаңында мәлімдеді.

Туризмнің дамуына көркем табиғатпен қатар белсенді инвестициялар да ықпал етуде. Жыл ішінде салаға 15 млрд теңге инвестиция салынып, бес ірі туристік нысан пайдалануға берілді. Орналастыру қызметтерінің көлемі 8 млрд теңгені құрады, сондай-ақ өңірде 500-ден астам орынға арналған жаңа нөмірлік қор қосылды. 2029 жылға дейін туристер ағынын жылына 650 мың адамға дейін арттыру жоспарланып отыр.

Өңір инфрақұрылымды белсенді дамытуда. Өткен жылы 600 шақырым жол жөнделді, оның ішінде туристік аймақтарға апаратын бағыттар бар. Биыл тағы 721 шақырым жол жөнделмек. Бухтарма су қоймасы арқылы өтетін көпір құрылысының аяқталуы — маңызды оқиға. Бұл көпір алты ауданды байланыстырып, тұрғындар мен қонақтар үшін маңызды көлік артериясына айналды.
Жол бойында әр ауданға екі санитарлық-гигиеналық торап орнату тапсырмасына сәйкес, әртүрлі ауданда барлығы 12 нысан іске қосылды.

Көптен күткен жобалардың бірі — Катонқарағай ауданында және Зайсан қаласында екі жаңа әуежайдың салынуы. Құрылыс жұмыстары басталып, аяқталуы осы жылдың соңына жоспарланған. Бұл облыстың алыс, бірақ табиғаты ерекше әсем аймақтарына қолжетімділікті айтарлықтай жеңілдетеді.

Шығыс Қазақстан туризмді «4E» тұжырымдамасы бойынша дамытуда: экотуризм, этнотуризм, іс-шаралар мен ойын-сауық. Бұл бағыттар өз нәтижесін бере бастады. Altai Fest, «Шығыс салбурыны» және Самар ауданындағы балық аулау мерекесі мыңдаған қатысушыны жинады. Биыл жазғы туристік маусымда Катонқарағай ауданында халықаралық «Рафтинг фестивалі» және Ұлан ауданында «Шығыс салбурыны 2025» өтеді деп күтілуде. Бұл шаралар Дүниежүзілік туристік ұйымның (UNWTO) күнтізбесіне енгізілуі мүмкін.

2024 жылы «Ауыл аманаты» бағдарламасы аясында туризм саласындағы жергілікті бастамаларды қолдау үшін 467,6 млн теңгеге 27 жоба қаржыландырылды. 2025 жылы бұл көрсеткіш 1,5 млрд теңгеге дейін артады.

Шығыс Қазақстан табиғи сұлулықты, ұлттық болмысты және заманауи инфрақұрылымды үйлестіре отырып, елдің жетекші туристік өңірлерінің бірі ретіндегі орнын нықтай түсуде.