ШҚО-да терроризмге осал нысандарда жұмыс істейтіндерге арналған оқыту өтті

2025 жылдың 13 мамырында Шығыс Қазақстан облысы бойынша Мемлекеттік кірістер департаментінде оқыту іс-шарасы өтті. Іс-шараға ШҚО әкімі аппаратының Терроризмге қарсы комиссиясының қызметін қамтамасыз ету бөлімінің басшысы Туткушев К.Т., сондай-ақ ҰҚК, ІІД және Мемлекеттік кірістер департаменті қызметкерлері қатысты, деп хабарлайды TuraNews.kz.

Террористік қауіп туындаған жағдайда осал нысандарда жұмыс істейтін қызметкерлердің алғашқы әрекеттері бойынша оқыту жүргізілді.

Қазақстан Республикасы Қаржы министрлігінің қарауындағы терроризмге осал нысандарды қорғауды ұйымдастыру бойынша нұсқаулық өткізілді.

Оқыту барысында террористік қауіп төнген жағдайда әрекет ету тәртібі және терроризмге қарсы іс-қимылды реттейтін нормативтік құқықтық актілердің талаптары түсіндірілді.

Қолдан жасалған жарылғыш құрылғылардың белгілері, иесіз заттарды анықтаған кезде мемлекеттік органдарға хабарлау тәртібі, сондай-ақ террористік қауіп туралы жалған хабарламаларға жауап беру рәсімдері мен эвакуация кезінде атқарылатын іс-әрекеттер мәселелері талқыланды.

Сондай-ақ, қатысушылар өздерін қызықтырған сұрақтарға жауап алды.

«Қауіпсіз ел» — бұл Қазақстандағы қауіпсіздік деңгейін арттыруға бағытталған ауқымды ұлттық жоба. Оның негізгі міндеті – елдегі қылмысты азайтып, азаматтар үшін тұрақты және сенімді орта қалыптастыру. Жоба тек бірқатар шаралардан тұрмайды, ол заңнаманы және құқық қорғау жүйесін үнемі жетілдіруді көздейтін үздіксіз процесс.

Негізгі мақсаттар:

Қылмыспен күрес: Құқық қорғау органдарының тиімділігін арттыру арқылы қылмыс деңгейін төмендету және халықтың қауіпсіздігін қамтамасыз ету.

Жол қауіпсіздігін жақсарту: Жол инфрақұрылымын жаңғырту, жүргізушілерді оқыту жүйесін жетілдіру және қауіпсіздікті арттыру үшін заманауи технологияларды қолдану.

Киберқауіпсіздікті күшейту: Елдің киберқорғанысын нығайту, кибершабуылдар мен киберқылмыстардан қорғауды қамтамасыз ету, сондай-ақ халықтың цифрлық сауаттылығын арттыру.

Экстремизм мен терроризмнің алдын алу: Экстремистік және террористік іс-әрекеттерге қарсы тұру, жастар арасында профилактикалық жұмыстар жүргізу, шекаралық бақылауды күшейту және интернеттегі радикалды насихатқа тосқауыл қою.

«Қауіпсіз ел» жобасы Қазақстанның ұлттық қауіпсіздік стратегиясына және Президент белгілеген басым міндеттерге сәйкес әзірленген. Бұл жоба елді алға бастыруға бағытталған жалпыұлттық көрсеткіштер мен мақсаттарға сүйенеді. Ол өзекті мәселелерді уақтылы шешуге бағытталған нақты тапсырмаларды қамтиды.