Қырғыз Республикасының Министрлер кабинеті «Қырғыз Республикасының ұлттық рәмізі ретінде қар барысы мәртебесін тану туралы» қаулы жобасын қоғамдық талқылауға шығарды, деп жазады Kazinform.
Құжатқа сәйкес, қар барысының логотипін ұлттық және халықаралық деңгейде қолдану ұсынылып отыр.
Келесі жағдайларда:
* ұлттық мерекелер мен есте қаларлық даталардағы көркем безендірудің тұрақты элементі ретінде;
* Қырғыз Республикасының монеталары мен банкноттарында;
* Мемлекет басшысының № 1 бортында;
* архитектуралық элементтерде (ғимарат қасбеттері, субұрқақтар, мүсіндер және барельефтер);
* табиғат, мәдени мұра және биік таулы экожүйелердің биологиялық әртүрлілігін қорғауға бағытталған білім беру бағдарламалары мен ғылыми жобаларда.
Заңды тұлғалар мен жеке кәсіпкерлердің логотипті пайдалануына мына жағдайларда жол беріледі:
* өнімдерге, соның ішінде кәдесыйларға;
* ғимараттарда, құрылыстарда, көліктерде және объектілерде;
* БАҚ-та жарияланатын туристік бағдарлар мен жарнамалық науқандардың бөлігі ретінде.
Логотипті ұлттық компаниялар мен ұйымдар пайдалана алады:
* халықаралық іс-шараларға арналған презентацияларды, буклеттер мен кәдесыйларды безендіруде;
* халықаралық нарықтарда Қырғызстанда өндірілген өнімді анықтау үшін; • туристік жарнамада және интернет сайттарында.
Қар барысы бейнеленген ұлттық логотип Қырғыз Республикасының визуалдық нышаны ғана емес, сонымен бірге халықтың ең маңызды құндылықтары — еркіндік, күш-қуат, тектілік және дамуға деген ұмтылыстың тұғыры болғаны атап өтілді. Ол заман рухын, болашаққа ұмтылыс, мәдени бастауларға деген құрметті танытады.
