Қырғызстанда азық-түлік қауіпсіздігі және тамақтану ғылыми-зерттеу институты пайда болады
Бұл туралы Азық-түлік қауіпсіздігі және тамақтану жөніндегі кеңес отырысында Қырғыз Республикасы Министрлер кабинеті төрағасының орынбасары – Су ресурстары, ауыл шаруашылығы және өңдеу өнеркәсібі министрі Бақыт Торобаев мәлім етті.
Шенеуніктің айтуынша, Қырғызстан президенті Садыр Жапаровтың тапсырмасы бойынша Азық-түлік қауіпсіздігі және тамақтану ғылыми-зерттеу институтының құрылуы агрономия және ветеринария саласында ғылыми зерттеулер жүргізуге ғана емес, сонымен қатар ауыл шаруашылығы өнімдерін өндіру және өңдеу технологияларын жетілдіру бойынша ұсынымдар әзірлеуге мүмкіндік береді. Бұдан бөлек, халықаралық ұйымдар және ғылыми мекемелермен азық-түлік қауіпсіздігі саласындағы озық әлемдік тәжірибені енгізу бойынша белсенді ынтымақтастық жоспарланып отыр.
«Мекеме еліміздің азық-түлік қауіпсіздігін жақсартатын білім мен инновация орталығына айналады. Институттың құрамы мен лауазымын бекітеміз. Бұл біздің агроөнеркәсіптік саясатымызды дамытудың жаңа кезеңіне айналатынына сенімдімін. Қырғызстанның әрбір азаматының сапалы және қауіпсіз азық-түлікке қол жеткізуі үшін бәріміз бірлесіп жұмыс істеуіміз керек. Бұл біздің ортақ міндетіміз», – деді Б.Торобаев.
Су ресурстары, ауыл шаруашылығы және өңдеу өнеркәсібі министрлігінің мәліметінше, 2024 жылдың қаңтар-шілде айларында 9 негізгі әлеуметтік маңызы бар азық-түлік тауарларының 7 түрі бойынша Қырғызстан өз нарығын отандық өндіріс арқылы толық қамтамасыз етеді. Атап айтқанда, нан өнімдері – 86,5%, картоп – 162,8%, көкөністер мен жемістер – 159%, ет – 79,1%, сүт – 116,3%, қант – 49,2%, жұмыртқа – 71,4%, өсімдік майы – 48,5%.
