Қазақстандық парадзюдошылар командалық есепте топ жарды

Парадзюдодан Қазақстанның ерлер және әйелдер құрамалары Азия чемпионатында командалық есепте жеңімпаз атанды, деп хабарлайды BasSport.kz.

Финалда Қазақстан әйелдер құрамасы Өзбекстан құрамасын 3:2 есебімен жеңді. Команда сапында Альфия Тілекқабыл, Ақмарал Науатбек және Динара Құжылова жеңіс сыйлады. Әйелдер құрамасында татамиде Альфия Тілекқабыл (J1-57 кг), Даяна Федосова (J2-70 кг), Зауре Әйтек (J1+70 кг), Ақмарал Науатбек (J2-70 кг) және Динара Құжылова (J2+70 кг) өнер көрсетті.

Өзбекстан құрамасы екінші орынға ие болды, ал үштікті Үндістан спортшылары түйіндеді.

Ерлер арасында командалық чемпионатта Қазақстан үшін шешуші кездесу Өзбекстанмен өтіп, жерлестеріміз 4:0 есебімен жеңіске жетті.

Бұл жарыста Олжас Оразалыұлы мен Токио-2020 Паралимпиада чемпионы Феруз Саидов арасында күрес аса тартысты өтті. Жекпе-жектің басында Феруз Саидов алғашқы «вазаримен» алға шыққанымен, Олжас есепті теңестіре алды.

Күрес қосымша уақытқа дейін жалғасты (алтын скор). Қосымша уақытта Олжас Оразалыұлы қарсыласынан айласын асырды.