Қазақстан мен Өзбекстан ғарыш саласындағы серіктестікті нығайтуға ниетті
Бүгінде Қазақстан мен Өзбекстан барлық саладағы байланыстарды нығайтып келеді. Олардың ішінде ғарыш кеңістігін бірлесіп игеру де басым бағыт саналады.
Бірнеше жыл бұрын қос мемлекет сала мамандарын оқыту бағдарламасын жүзеге асырса, ендігі кезекте жаңа спутник құрастыру жобаларын талқылап, ақпарат алмасу ісін жоғары деңгейге көтеріп жатыр, деп хабарлайды Kazinform агенттігі.
Біздің елімізбен Өзбекстан ғарыш кеңістігін серіктестікте игеріп келеді. Мәселен, қос мемлекет ынтымақтастық аясында мониторингімен айналысатын мамандарды даярлап, тәжірибе алмасып отырады.
«Өзбекғарыш» агенттігі құрылған сәттен бастап «Қазғарыш» оған маңызды серіктес болды. Бастапқыда, яғни 2021 жылдың соңында ғарышты бейбіт мақсатта игеру жөніндегі екі елдің үкіметаралық келісімі бекітілді. Соның аясында қызметкерлерімізді оқытуға бағытталған нәтижелі жұмыс атқарылды. Әрі ғарыштық мониторинг тәжірибесі үлгі ретінде алынды. Бірқатар пилоттық жоба іске асты», — деп тоқталды Өзбекстан ғарыштық технология және зерттеу агенттігінің бөлім басшысы Исмаил Расулов.
Әзірге көршілес елдің қашықтан зондтауға арналған өз спутнигі жоқ. Бұған қарамастан Өзбекстанда ғарыштық мониторинг мемлекеттік деңгейде бекітілген. Яғни, космостан жасалған суреттер негізінде алынған ақпараттарға қатысты қажетті шаралар үкімет дәрежесінде қабылданады. Ал Қазақстанда ғарыштық мониторингі мемлекеттік деңгейдегі мәртебеге ие емес.
Қазақстан мен Өзбекстан арасында ғарыштан түсірілген суреттерді алмасу келісімі бар. Бұл бағытта коммерциялық мәміле жасалған. Осы күні Орталық Азиядағы 5 ел бірігіп, ғарышқа жеке жерсеріктер шоғырын қалыптастыру бастамасын да көтерді. Бұл ретте біздің ел көршілерге спутник құрастырып, оны көкке ұшыратын инфрақұрылым ұсынуға дайын.
