Түркия Туризмді насихаттау және дамыту агенттігі (TGA) мен Түрік әуе жолдарының (THY) бірлескен ұйымдастыруымен 28 қыркүйек пен 4 қазан аралығында Қазақстанның жетекші туроператорлары мен туристік агенттіктерінің өкілдері Қаратеңіз аймағына таныстыру сапарына қатысты.
Бағдарлама Түркияның солтүстігінде орналасқан Самсун, Орду, Гиресун және Трабзон қалаларын қамтыды. Қатысушылар өңірдің табиғи көріністерімен, мәдени мұрасымен және туризм инфрақұрылымымен жақынырақ танысу мүмкіндігіне ие болды.
Сапардың алғашқы күні Самсунда басталды. Делегация Везиркөпру ауданындағы Шаhинкая шатқалында қайықпен серуендеп, Самсун археология және Амазон ауыл мұражайлары мен Бандырма Вапуру музейін аралады. Күн соңында Sheraton Grand Samsun қонақүйінде өткен кешкі ас кезінде жергілікті тағамдар ұсынылды.
Екінші күн Орду қаласында өтті. Қатысушылар Першембе жайлауында табиғат аясында серуендеп, Ясон мүйісінен және Бозтепеден Қаратеңіздің әсем көрінісін тамашалады. Сондай-ақ RaytaPark-тағы таулы шанамен сырғанау белсенділігі арқылы аймақтың балама туризм әлеуетін байқап көрді.
Гиресун мен Трабзон кезеңдерінде делегация Күзалан сарқырамасы, Көк көл және Гөксу травертиндері сияқты табиғи нысандарды аралады. Бағдарламада сондай-ақ Сүмела монастыры, Айя-София мешіті және Ататүрік қонақүйі секілді тарихи орындар болды. Ұзынгөлде өткен таныстыру сапары барысында қатысушылар аймақтағы қонақүй нысандары мен туризм қызметтері туралы мәлімет алды.
Сапардың соңғы күні Трабзонда өңірдің туризм саласының өкілдерімен B2B кездесулер ұйымдастырылды. Кездесулерде Қаратеңіз аймағын Қазақстан нарығында неғұрлым тиімді таныту және екі ел арасындағы туризм байланысын арттыру мәселелері талқыланды.
