Қараман әкімі Мехмет Фатих Чичеклидің шақыруымен келген ТҮРКСОЙ делегациясы Әзербайжан, Қазақстан, Қырғызстан, Өзбекстан және Түркіменстаннан келген өнерпаздармен іс-шараға қатысты, деп жазады ТҮРКСОЙ-дың баспасөз қызметі.
748 жыл бұрын Қараманұлы Мехмет Бейдің жариялаған және «Бұдан былай ешкім есікте, диванда, мәжілісте және серуендеуде түрік тілінен басқа тілде сөйлемесін!» деген сөздерімен тарихқа енген жарлығы түрік тілінің мемлекеттік тіл ретінде қабылдануының бастауы болып саналады. Бұл тарихи қадам Қараманды Түрік тілінің астанасы мәртебесіне көтеріп, жыл сайын өткізілетін Түрік тілі күнінің негізін қалады.
Іс-шарада Әзербайжанның Шуша музыкалық тобы өнер көрсетіп, «Дүние жүзіндегі алғашқы жылжымалы сөздік» атты шеру өтті. Одан кейін ТҮРКСОЙ ұжымдары бірлескен қойылым жасады.
Лүтфи Элван көрме орталығында өткен шарада Өзбекстан, Қазақстан және Қырғызстан топтары мәдени өнер көрсетті.
