Көрермендердің қол шапалағы мен домбыра үні астында, Кеңгір жағалауында осы жаздың ең әсерлі әрі жанға жақын спорттық мерекелерінің бірі — ұлттық турнирдің облыстық кезеңі «Қажымұқан жолы» өтті.
Ұлытау облысының ең мықты сегіз батыры күшті көпсайыс форматында таза әрі әділ күреске шығып, тек физикалық күшін ғана емес, сонымен қатар қазақ рухының ұлы дәстүріне деген құрметін көрсетті.
«Қажымұқан жолы» жобасы — бұл жай ғана жарыс емес. Бұл — Қазақстан спортшылары одағы республикалық қоғамдық бірлестігі бастамасымен қолға алынған ауқымды мәдени-спорттық қозғалыстың бір бөлігі. Жобаның мақсаты — ұлттық күш спорт түрлерін насихаттау, жастар арасында тарихи мұраға деген құрмет қалыптастыру және Қажымұқан Мұңайтпасұлы сынды аңыз тұлғалардың есімін жаңғырту.
Жарысқа қатысқан спортшылар:
1. Қайрат Хамзин
2. Асқар Әбдіхамит
3. Рахат Ханафин
4. Орынбай Наурызбаев
5. Марат Бейсекеев
6. Бекарыс Айтжан
7. Мұхтар Ильясов
8. Шамшиден Мырзабек
Қосымша екі спортшы жарақат не басқа форс-мажор жағдайлар үшін резервке енгізілді. Қатысушылар қатаң талаптар бойынша іріктелді: дене дайындығы, салмақ санаты және жасы (тек кәмелет жасына толғандар қатыса алды). Турнирдің негізін қалаушы С.В. Цырульников іріктеуді жеке өзі жүргізді.
Жарыс алдында барлық қатысушыларға қауіпсіздік техникасы мен ережелері бойынша нұсқаулық берілді.
Күш пен рухтың бес сынағы
Жарыстар бес ұлттық спорт түрі бойынша өтті. Әрқайсысы — дала тіршілігімен, табиғатпен және қазақ халқының өмір салтымен тығыз байланысты:
1. Қаптарды биіктікке көтеру
Бір минут ішінде спортшыларға салмағы 60-90 кг аралығындағы төрт қапты тұғырға көтеру қажет болды. Нәтиже көтерілген қап санына және жұмсалған уақытқа қарай есептелді.
2. Бөренені бір қолмен иыққа көтеру
Қарапайым көрінгенімен, бұл жаттығу орасан күшті тепе-теңдік, үйлесімділік пен ішкі тұрақтылықты талап етті. Екінші қолмен көмектесуге қатаң тыйым салынды.
3. Табиғи тасты тұғырға көтеру
Қазақ батырларының дәстүрлі ойындарына тікелей сілтеме. Мұнда тек күш қана емес, дұрыс ұстау техникасы да маңызды.
4. Металл прутты ию
Ең әсерлі жарыстардың бірі. Әр қатысушы 80 градустан кем емес бұрышпен барынша көп прутты иіп шығуы тиіс. Нағыз «темір батыр»!
5. Белдесу – белбеу күресі
Бұл жарыс салмақ дәрежесіне бөлінбей өтті. Негізгі мақсат — қарсыласты тепе-теңдіктен шығару. Әр белдесу екі минутқа созылды, табаннан басқа дененің кез келген бөлігімен алғаш тиген сәт есепке алынды.
Марапаттау рәсімі салтанатты түрде өтті. Жеңімпаздарға медаль, диплом және басты жүлде — турнир логотипі бейнеленген металл шевроны бар былғары белдік табысталды.
Жарыс қорытындысы бойынша жүлделі орындар келесідей бөлінді:
• 1 орын – Әбдіхамит Асқар
• 2 орын – Ханафин Рахат
• 3 орын – Мырзабек Шамшиден
Бас жүлде — Ұлытау облысының атынан «Қажымұқан жолы» ұлттық спорттық ойындарының республикалық кезеңіне қатысу құқығы — турнир жеңімпазы Әбдіхамит Асқарға бұйырды.
