Президент: Қазақстан дамудың даңғыл жолына түсті
Қазақстан Республикасының Президенті Қасым-Жомарт Тоқаев еліміздегі инфрақұрылымдық даму мен экономикалық өсімге қатысты маңызды мәлімдеме жасады.
Мемлекет басшысының айтуынша, қазіргі таңда барлық өңірде ауқымды құрылыс жұмыстары жүріп жатыр.
– «Қазір Қазақстанның барлық аймағында мыңдаған шақырым жол салынып, жөнделуде. Әуежайлар мен көпірлер бой көтеріп, су нысандарының құрылысы басталып жатыр. Тұрғын-үй коммуналдық шаруашылығы және басқа да маңызды инфрақұрылым салынуда. Үкіметке инфрақұрылымдық құрылыстың сапасына баса мән беру қажет деген қатаң нұсқау берілді. Бұл мәселе Үкіметтің және құқық қорғау мекемелерінің бақылауында болады», – деді Президент.
Индустрия және экономикадағы серпін
Мемлекет басшысы елде жыл сайын көптеген жаңа өндіріс орындары ашылып жатқанын, әсіресе жоғары технологиялық кәсіпорындардың көбеюі ұлттық экономиканың тұрақты индустриялық негізін қалыптастырып жатқанын атап өтті.
Инвестиция тарту, бизнеске қолайлы жағдай жасау және аймақтарды қолдау бойынша жүйелі жұмыс нәтижесінде биылғы жеті айдағы экономикалық өсім 6 пайыздан асты.
Реформалар мен бірліктің жемісі
Президент жеткен жетістіктердің бәрі кездейсоқ емес екенін айтты.
– «Мұның бәрі аяқ астынан пайда болған жоқ. Бұл – қажырлы еңбектің және табанды түрде жасалған түбегейлі реформалардың нәтижесі. Жүйелі және үйлесімді жұмыс пен берекелі бірліктің арқасында еліміз жаңа кезеңге қадам басты», – деді Қасым-Жомарт Тоқаев.
Алдағы мақсат
Мемлекет басшысы Қазақстанның даму бағытын айқындап, нақты ұстанымға шақырды.
– «Бір сөзбен айтқанда, Қазақстан біртіндеп дамудың даңғыл жолына түсіп келеді. Енді бос сөзге берілмей, жан-жақты өркендеуге бастайтын осы бағдарымыздан айнымай, тек қана алға ұмтылуымыз керек. Сонда біз озық ойлы ұлт болып, теңдессіз табысқа қол жеткіземіз, биік белестерді бағындырамыз», – деді Президент.
