Президент: Қазақстан білім, ғылым, мәдениет және цифрландыруда ілгерілеп келеді
Мемлекет басшысы Қасым-Жомарт Тоқаев Конституция күніне орай сөйлеген сөзінде Ата Заңның қоғамдағы рөлі мен елдің дамуындағы маңызын атап өтті.
Президенттің айтуынша, Конституция – ұлттық құндылықтар мен халықтың мақсат-мүддесін біріктіретін басты құжат. Оның әрбір бабында елдің бірлігі мен дамуына жол ашатын жасампаздық күші бар.
– «Конституциялық, саяси, экономикалық реформалардың, халқымыздың орасан зор әлеуетінің, сондай-ақ білім, ғылым және мәдениет саласына салынған ауқымды инвестициялардың арқасында елімізде шын мәнінде жақсы өзгерістер жасалып жатыр. Жақсыны жақсы деп айту керек. Бұл – әділеттіліктің көрінісі», – деді Қ.Тоқаев.
Мемлекет басшысы жастардың жетістіктеріне де ерекше тоқталды. Қазіргі таңда оқушылар мен студенттер халықаралық олимпиадаларда жүлделі орындар иеленіп, еліміздің атын әлемге танытып жүр. Спортшылар да халықаралық додаларда жеңіс тұғырынан көрінуде.
Сондай-ақ Президент Қазақстанның ашық мемлекет екенін атап өтті. Азаматтардың еркін ақпарат алуына, интернетті пайдалануға, шетелге шығуына және қалаған университетінде білім алуына ешқандай кедергі жоқ. Бұл саясат алдағы уақытта да жалғасын табатынын айтты.
– «Көптеген елдің жастары Қазақстанды болашағы жарқын мемлекет ретінде таниды. Біздің елімізге келіп білім алып, жұмыс істегісі келетіндер артып келеді. Біз цифрландыру мен жасанды интеллектіні ел игілігіне қолданатын озық мемлекет боламыз», – деді Қасым-Жомарт Тоқаев.
Мемлекет басшысы еліміздің мақсаты айқын, келешегі зор екенін тағы да баса айтты.
