Президент: Жаңарған Конституция – азаматтардың құқықтары мен мүдделерін қорғайтын басты құрал
Қазақстан Республикасының Президенті Қасым-Жомарт Тоқаев Конституция күніне орай сөйлеген сөзінде елімізде жүргізілген реформалардың нәтижесіне және Ата Заңның қоғамдағы орнына тоқталды.
Мемлекет басшысының айтуынша, Конституциялық реформа Қазақстандағы саяси, экономикалық және әлеуметтік өзгерістердің берік құқықтық арқауы болды. Бұл «Әділетті мемлекет» қағидатын іс жүзінде жүзеге асыруға мүмкіндік ашты.
– «Жалпы айтқанда, біз мемлекеттік саясатта терең өзгеріс жасадық. Конституциялық реформа осы ауқымды жұмыстың берік құқықтық арқауы болды. Сол арқылы саясатта, экономикада, әлеуметтік салада, сот жүйесінде «Әділетті мемлекет» қағидатын жүзеге асыруға жол ашылды», – деді Президент.
«Ұлттық қор – балаларға» бағдарламасы
Президент Конституцияда бекітілген қағидаттарға сәйкес, елдегі табиғи ресурстар халыққа тиесілі екенін еске салды. Осыны іс жүзінде орындау үшін мемлекет маңызды қадамдар жасады.
Соның бірі – «Ұлттық қор – балаларға» бағдарламасы. Қасым-Жомарт Тоқаевтың тапсырмасымен қолға алынған бұл бастама аясында қордың жыл сайынғы инвестициялық табысының жартысы балалардың арнайы есепшотына аударылады.
– «Былтырдан бері Ұлттық қордан 1,5 миллиард доллардан астам қаржы бөлінді. Бұл – жас ұрпақтың болашаққа нық сеніммен қарауына мүмкіндік беретін мемлекетіміздің өте маңызды шешімі», – деді Мемлекет басшысы.
Құқықтық реформалар және азаматтарды қорғау
Президент жаңарған Конституцияның жемісі ретінде құқық қорғау саласындағы маңызды заңнамалық өзгерістерді де атап өтті.
Оның ішінде:
• Адам саудасына қарсы іс-қимыл туралы заң қабылданды. Бұл – азаматтарды еркінен тыс пайдалануға қарсы кепілдікті күшейтті.
• Тұрмыстық зорлық-зомбылық үшін жаза қатаңдатылды, некеге мәжбүрлеу қылмыстық жауапкершілікке алынды.
• Адам ұрлау қылмысы үшін жаза күшейтілді.
• Қылмыстық сот процесін ізгілендіру, оның тиімділігін арттыру үшін тиісті кодекстерге ауқымды түзетулер енгізілді.
Рақымшылық туралы заң
Президент Конституцияның мерейлі белесіне орай қабылданған Рақымшылық туралы заңның мәніне де тоқталды. Оның айтуынша, мемлекет қылмыспен күрес пен әлеуметтік әділдік мәселесінде адамгершілік құндылықтарды басты орынға қояды.
– «Ата Заң, шын мәнінде, азаматтардың құқықтары мен мүдделерін қорғайтын толыққанды әрі тиімді құралға айналды», – деп қорытындылады Мемлекет басшысы.
