Өзбекстанда Telegram мессенджері ішіндегі халықаралық криптовалюта әмияны Wallet in Telegram ресми түрде іске қосылды, деп жазады Trend агенттігі.
Қызмет Telegram қолданушыларына криптовалюта активтерін тікелей мессенджер арқылы сатып алуға, сатуға, жіберуге және қабылдауға мүмкіндік береді. Одан бөлек, жергілікті төлем жүйелері де пайдаланылады.
Wallet in Telegram қосымша интерфейсіне толығымен интеграцияланған, сондықтан пайдаланушыларға бөлек қосымша орнату талап етілмейді. Платформа Bitcoin, Toncoin, USDT және 200-ден астам басқа токендерді қолдауға қабілетті.
Қызметтің технологиялық инфрақұрылымын Өзбекстандағы ірі криптовалюта экожүйесі Asterium қамтамасыз етеді. Аталған серіктестік Humo, Visa және Mastercard төлем карталары арқылы қауіпсіз транзакцияларды жүзеге асыруға мүмкіндік береді.
Қызметтің іске қосылуы Ұлттық перспективалық жобалар агенттігінің (NAPP) ресми лицензиялауымен расталған және елдің реттелетін цифрлық қаржы секторын дамыту стратегиясына толық сәйкес келеді.
Қазіргі уақытта Wallet in Telegram әлем бойынша 150 миллионнан астам тіркелген қолданушыға ие және алдағы екі жылда өз қызметін 15 жаңа нарыққа кеңейтуді жоспарлап отыр.
