Өзбекстанда шілде айының қорытындысы бойынша жылдық инфляция 9 пайыздан төмен түсті, бұл – соңғы жеті жылдағы ең төменгі көрсеткіш, деп жазады Turanews.kz ҚазАқпарат агенттігіне сілтеме жасап.
Өзбекстан статистика агенттігінің мәліметіне сәйкес, 2023 жылдың шілде айында елдегі дефляция 0,16% деңгейінде тіркелсе, жылдық көрсеткіштегі инфляция 8,9% деңгейінде болды.
Өткен айда орта есеппен 0,9%-ға арзандаған азық-түлік тауарлары маусымдық дефляцияның негізгі факторы болды, ал азық-түлік емес тауарлар 0,3%-ға, қызметтер 0,5%-ға қымбаттады.
«Көкөністер, дәнді дақылдар мен жарма өнімдеріне, майларға, сүт және сүт өнімдеріне және жұмыртқаға бағаның төмендеуі есебінен ағымдағы жылдың шілде айында қысқа мерзімді жиынтық ТБИ (тұтыну бағаларының индексі) 0,46 пайыздық көрсеткішке төмендеді», – деп хабарлайды статагенттік.
Ведомствоның мәліметінше, жыл басынан бері инфляция 3,3% төмендеді, жылдық инфляция 8,9%-ға дейін төмендеді.
Бұл – 2016 жылдың тамызынан бергі ең төменгі көрсеткіш (8,6%).
Бір жыл ішінде азық-түлік тауарлары орташа алғанда 10,7%-ға, азық-түлікке жатпайтын тауарлар 7,3%-ға, қызметтер 8,2%-ға қымбаттады.
