Өзбекстан Президенті Түркия делегациясын қабылдады
Өзбекстан Республикасының Президенті Шавкат Мирзиёев 12 қыркүйек күні Түркия Республикасының сыртқы істер министрі Хакан Фидан, ішкі істер министрі Али Ерликая және Ұлттық барлау қызметінің директоры Ибрахим Калын бастаған делегацияны қабылдады.
Кездесу басында мәртебелі қонақтар Шавкат Мирзиёевке Түркия Президенті Режеп Тайып Ердоғанның шынайы сәлемі мен ізгі тілектерін жеткізді, деп жазады ӨзА агенттігі.
Өзбекстан Президентінің биылғы 6-7 маусым күндері Түркияға жасаған ресми сапары барысында қол жеткізілген келісімдерді жүзеге асыру аясында Өзбекстан мен Түркия арасындағы кең ауқымды стратегиялық серіктестікті нығайту және көпжақты ынтымақтастықты дамыту мәселелері қаралды.
Бүгін екі ел министрлері мен ведомстволары басшылары өткізген бірлескен кездесудің нәтижелері жоғары бағаланды. Қабылданған «жол картасына» сәйкес тұрақты және жүйелі байланыстарды жалғастыру, мұндай келіссөздердің форматы мен күн тәртібін кеңейту маңызды екені атап өтілді.
Саяси диалогты тереңдету, сауда-экономикалық және инвестициялық ынтымақтастық жобаларын ілгерілету мәселелері талқыланды. Қауіпсіздікке заманауи қауіп-қатерлерге қарсы күрес бойынша ведомствоаралық ынтымақтастықты күшейту және бірлескен шаралар өткізуге ерекше көңіл бөлінді.
Сонымен қатар, өңірлік ынтымақтастық және халықаралық ұйымдар аясындағы серіктестіктің өзекті мәселелері бойынша пікір алмасылды.
