Өскеменде ұландықтар Ата Заң күнін атап өтті
Ата Заңның 30 жылдығына орай Ұлттық ұланның Шығыс өңірлік қолбасшылығында Конституция күніне арналған салтанатты іс-шара өтті.
Жиынға басқарма офицерлері мен келісімшарт бойынша әскери қызметшілер қатысты.
Ұландықтарды мерекемен «Шығыс» өңірлік қолбасшылығының қолбасшысы генерал-майор Арман Жұмағалиев құттықтады.
– Конституция қабылданған күннен бастап, көпұлтты халқымыздың татулығы мен тұрақтылығына тұғыр болып келеді. Біз алғышартқа айналған құжаттың арқасында еліміздің іргесін бекітіп, дамудың жаңа кезеңіне түстік. Конституция – еліміздің үздіксіз өсуіне кепіл болған барша заңдардың қайнар көзі. Құқықтық тәртіп әскері Қазақстан Республикасының Конституциясы жүктеген талаптар мен міндеттерді мүлтіксіз орындап келеді. Жауынгерлеріміздің Тәуелсіздік туын одан әрі биік ұстайтынына сенімдімін, – деді генерал-майор.
Сондай-ақ, салтанатты шарада қызметтік міндетін адал атқарып, үздік жетістіктерге қол жеткізген әскери қызметшілер бас қолбасшылықтың және өңірлік қолбасшылық атынан марапатталды.
