Өскеменде жаңа сквер ашылды
Облыс орталығында Шәкәрім даңғылы бойындағы сквердың ашылуы өтті. Шара аясында облыстық оркестрлер шеруі, ретро автокөліктер мен «Retro Oskemen» фестивалі өтті.
— Облыс әкімі Ермек Беделбайұлы Көшербаевтың тапсырмасымен Өскеменде қала көшелерін абаттандыру бойынша ауқымды жобалар жүзеге асырылуда. Бүгін Шәкәрім даңғылы бойында жаңа сквердың ашылуы, сондай-ақ Мәдениет сарайының маңында бұрынғы келбетті сақтауға тырыстық. Үйлердің қасбеттері қалпына келтірілді. Бүгінде қаламыз көркейіп келеді. Сондай-ақ ретро фестиваль өтіп жатыр, оған облыстың түкпір-түкпірінен тұрғындар келді, — деді Өскемен қаласының әкімі Жақсылық Омар.
Жаңа скверде беседкалар орнатылып, серуендеу алаңдары абаттандырылып, асфальт пен жол жөнделді. Айта кетейік, бұған дейін Шәкәрім даңғылындағы шағын алаңды ағаштар мен бұталар басып кеткен. Ол жерде қоқыс алаңы да болған.
Салтанатты ашылуда азаматтарға сайыстар мен концерттік бағдарлама, интерактивті ойындар, викториналар, ретро стиліндегі кітаптар мен фотосуреттер көрмесі ұсынылды. Сонымен қатар тұрғындар спорттық жарыстарға, мерекелік сауда-саттықтарға қатысып, түрлі тағамдардан дәм татты.
