Кубада «Қазақстан фотосуреттерде» фотокөрмесі ашылды
Куба астанасында «Қазақстан фотосуреттерде» фотокөрмесінің ресми ашылу рәсімі өтті. Іс-шара қаланың көрікті жерлерінің бірі – ЮНЕСКО-ның Бүкіләлемдік мұрасы болып табылатын «Ескі Гавананың» тарихи орталығында орналасқан Әулие Франциск Ассизи атындағы кіші базиликада өткізілді, деп хабарлайды Turanews.kz, ҚР СІМ баспасөз қызметіне сілтеме жасап.
Фотокөрме бағдарламасына табиғат, елорда, еліміздің индустриялық әлеуеті, ұлтаралық келісім, ерекше мәдени дәстүрлер, танымал тұлғалардың спорттық және шығармашылық жетістіктері қамтылған және т.б. қоса алғанда әртүрлі тақырыптағы жүзге жуық фотосуреттер кірді.
Гавана тарихнама кеңсесі бас директорының орынбасары Перла Росалес өзінің құттықтау сөзінде осы іс-шараны ұйымдастырғаны үшін Елшілікке шын жүректен ризашылығын білдіріп, бір ай көлемінде жұмыс істеп тұратын фотоэкспозиция жергілікті қалың жұртшылыққа көп қырлы Қазақстанмен және оның жетістіктерімен танысуға жақсы мүмкіндік беретінін атап өтті.
Қазақстанның Кубадағы Елшісі Андриан Елемесов Қазақстан туралы алғаш рет өткізіліп отырған фотокөрме екі халықтың жақындасуына елеулі үлес қосатынын және мәдени-гуманитарлық ынтымақтастықтағы маңызды кезең болатынын атап өтті. Алыс географиялық қашықтыққа қарамастан, Қазақстан мен Куба екіжақты қатынастарды дамыту үшін айтарлықтай әлеуетке ие екеніне тоқталды.
Фотокөрменің ресми ашылу рәсіміне болу елінің қоғамдық-саяси және мәдени қоғамдастықтарының, сондай-ақ жастар бірлестіктерінің, дипломатиялық корпустың өкілдері қатысты. Іс-шара 2023 жылдың қаңтар айының соңына дейін жалғасады.
