Ата Заңымыздың 30 жылдық мерейтойы қарсаңында Глубокое ауданының Верхнеберезовский ауылында салтанатты түрде отбасылық дәрігерлік амбулатория ашылды. Сондай-ақ Уварово ауылында фельдшерлік-акушерлік пункт пайдалануға берілді.
Екі нысан да Шығыс Қазақстан облысында жүзеге асып жатқан «Ауылдық денсаулық сақтауды жаңғырту» ұлттық пилоттық жобасы аясында салынды.
– Амбулатория санитарлық-эпидемиологиялық бақылаудың барлық нормативтік-құқықтық талаптарына сай келеді және ауыл тұрғындарына толыққанды әрі сапалы медициналық көмек көрсетуге арналған заманауи құрал-жабдықтармен қамтылған, – деді Глубокое аудандық ауруханасының бас дәрігері Мирхат Увазыров.
Амбулаторияның жобалық қуаты – ауысымына 25 адамды қабылдайды. 4 орындық күндізгі стационар қарастырылған. Ауданы 440 шаршы метрді құрайтын нысанда 23 кабинет бар. Физиотерапия және емдік дене шынықтыру бөлмелері, заманауи видеокольпоскоппен жабдықталған акушерлік-гинекологиялық кабинет, қақырық жинауға арналған жеке кабинет пен тіс дәрігерінің бөлмесіне дейін жобаланған.
Мирхат Увазыровтың айтуынша, бұған дейін ауылда толыққанды амбулаториялық ғимарат болмаған. 1951 жылы салынған ескі ғимарат апатты жағдайда деп танылып, 2018 жылдан бері дәрігерлер халықты техникалық колледж ғимаратында қабылдап келді. Енді ауыл тұрғындары медициналық қызметті жаңа, жайлы әрі заманауи ғимаратта ала алады.
Верхнеберезовский ауылында 1900 адам тұрса, 330 науқас артериялық гипертония, 110 адам қант диабеті бойынша динамикалық бақылауда тұр. Бұдан бөлек мүмкіндігі шектеулі 70 адам бар. Жаңа ғимарат олардың қажеттіліктерін ескере отырып жабдықталған.
Салтанатты ашылу рәсіміне қатысқан облыстық Достық үйі жанындағы АНК Ақсақалдар кеңесінің төрағасы, Глубокое ауданының Құрметті азаматы Дүйсембай Үрімбаев ауылдастарын Конституцияның 30 жылдығымен және жаңа амбулаторияның ашылуымен құттықтады.
–Бұл ауылда 43 жыл тұрамын. Бүгінгі күн ерекше әрі толғандырарлық сәт, – деді Дүйсембай Үрімбаев.
Жаңа ғимараттың құрылыс жұмыстарының барысы тұрақты түрде халық қалаулыларының бақылауында болды.
– Мұндай медициналық нысандар – дәрігерлік амбулаториялар мен медициналық пункттер – өңірде соңғы үш жылда белсенді түрде салынып келеді. Жоспарланған 36 нысанның 34-інің құрылысы аяқталды. Қыркүйек айында қалғандарының да құрылысы толық бітеді деп жоспарлап отырмыз, – деді «AMANAT» партиясы ШҚОФ төрағасының орынбасары Аманбай Нүркенов.
«Ауылдық денсаулық сақтауды жаңғырту» бағдарламасы аясында бой көтеріп жатқан нысандар медициналық құрал-жабдықтармен және жиһаздармен толық жабдықталуымен ерекшеленеді. Бұл халықтың денсаулығын нығайтуға, уақытылы алдын алу шараларын жүргізуге және скринингтік тексерулер өткізуге үлкен мүмкіндік береді.
Шығыс Қазақстан облысында денсаулық сақтау саласын жаңғырту қарқынды түрде жалғасуда. Бұл ретте басты назар – кадр, технология және инфрақұрылым мәселелеріне аударылуда. Биыл маусым айында ШҚО әкімі Нұрымбет Сақтағанов медицина саласын өңір дамуының басты басымдықтарының бірі ретінде атап өткен болатын.
– Медицина – үнемі дамып отыратын сала. Дәрігерлер соңғы ғылыми жетістіктерді халық игілігіне жаратып, ел денсаулығына пайдалануы маңызды. Жаңа заман медицина қызметкерінен тек кәсібилік пен жауапкершілік қана емес, үнемі даму, жаңа технологияларды енгізу талап етіледі, – деген болатын өңір басшысы Нұрымбет Сақтағанов.
