Ильхам Әлиев: Өзара ынтымақтастық пен одақтастықтың жаңа деңгейіне көтеріліп жатырмыз

Әзербайжан мен Қазақстан қарым-қатынасының негізі – гуманитарлық сала. Бұл туралы Ақордада Мемлекет басшысы Қасым-Жомарт Тоқаевпен кеңейтілген құрамда келіссөз жүргізген Әзербайжан Президенті Ильхам Әлиев айтты, деп жазады Turanews.kz ҚазАқпарат агенттігіне сілтеме жасап.

«Ең алдымен, Қазақстанға ресми сапармен шақырғаныңыз үшін тағы да алғыс айтамын. Бауырлас қазақ жеріне келгеніме қуаныштымын. Біздің қарым-қатынасымыз нығайып келеді. Халықтарымыздың арасындағы байланыстың тарихы терең әрі біз әрдайым бір-бірімізге бауыр ретінде қараймыз. Бүгін осы берік іргетастың негізінде келешегімізді бірге құрып жатырмыз. Біз бұған дейін талқылаған ынтымақтастықтың барлық саласының әлеуеті мол», — деді ол.

Әзербайжан Президенті гуманитарлық саладағы ынтымақтастықтың айрықша маңызды екеніне тоқталды.

«Қазақстанның Әзербайжандағы, сондай-ақ Әзербайжанның Қазақстандағы мәдениет күндерінің ұйымдастырылуы елдерімізді одан әрі жақындата түсіп, халықтарымыздың терең тарихы мен бай мәдениетін паш етеді. Біздің ойымызша, мемлекетаралық қарым-қатынасымыздың негізі – осы гуманитарлық сала. Әрине, екі тараптың да мүддесіне сай салалар аз емес. Біз, шын мәнінде, өзара ынтымақтастық пен одақтастықтың жаңа деңгейіне көтеріліп жатырмыз», — деді Ильхам Әлиев.