Глубокое ауданында Конституция күні қарсаңында жаңа отбасылық амбулатория ашылды
Қазақстан Республикасының Конституциясының 30 жылдығы қарсаңында, Глубокое ауданының Верхнеберезовка ауылында отбасылық дәрігерлік амбулаторияның салтанатты ашылуы өтті.
Жоба Шығыс Қазақстан облысында «Ауылдық денсаулық сақтауды жаңғырту» Ұлттық пилоттық жобасы аясында жүзеге асырылды.
Амбулатория санитарлық-эпидемиологиялық талаптарға толық сәйкес келеді және заманауи құрал-жабдықтармен жабдықталған. «Бұл ауыл тұрғындарына сапалы медициналық көмек көрсетуге мүмкіндік береді», – деді Глубокое аудандық ауруханасының бас дәрігері Мирхат Увазыров.
Амбулаторияның жобалық қуаты – ауысымына 25 адам. Мұнда 4 күндізгі төсек-орын қарастырылған. Жалпы ауданы 440 шаршы метрді құрайтын ғимаратта 23 кабинет бар. Оның ішінде физиотерапия мен емдік дене шынықтыру бөлмелері, акушер-гинекологиялық кабинет (заманауи видеокольпоскоппен жабдықталған), қақырық жинауға арналған бөлек кабинет және стоматологиялық кабинет бар.
Мирхат Увазыровтың айтуынша, ауылда бұрын толыққанды амбулатория ғимараты болмаған. 1951 жылы салынған ескі ғимарат апатты деп танылғандықтан, 2018 жылдан бері дәрігерлер техникалық колледж ғимаратында қабылдау жүргізіп келген. «Енді ауыл тұрғындары заманауи ғимаратта медициналық көмек ала алады», – деді ол.
Верхнеберезовка ауылында 1900 адам тұрады. Олардың ішінде 330-ы артериялық гипертония, 110-ы қант диабеті бойынша диспансерлік есепте тұр. Сондай-ақ, ауылда 70 мүгедектігі бар адам бар. Жаңа ғимарат олар үшін де ыңғайлы етіп жабдықталған.
Ашылу рәсімінде сөз сөйлеген Глубокое ауданының құрметті азаматы, Ақсақалдар кеңесінің төрағасы, облыстық Достық үйі жанындағы ҚХА кеңесінің мүшесі Дүйсембай Урумбаев жерлестерін ҚР Конституциясының 30 жылдығымен және амбулаторияның ашылуымен құттықтады.
«Мен бұл ауылда 43 жылдан бері тұрамын. Бүгінгі күн біз үшін қуанышты әрі толқытатын оқиға», – деді ол.
Жаңа амбулаторияның штаттық құрамы толығымен жасақталуда. Жақын күндері қосымша стоматолог-дантист, емдік дене шынықтыру нұсқаушысы және физиотерапия маманы жұмысқа қабылданбақ.
Құрылыс барысы депутаттардың тұрақты бақылауында болды.
«Бұл сияқты ауылдық дәрігерлік амбулаториялар мен медициналық пункттер облыс бойынша соңғы үш жыл ішінде салынып келеді. Бүгінгі таңда жоспарланған 36 нысанның 34-і толық аяқталды. Қыркүйек айында барлық нысандарды пайдалануға беруді жоспарлап отырмыз», – деді «AMANAT» партиясының облыстық филиалы төрағасының орынбасары Аманбай Нүркенов.
Айта кетейік, ауылдарда медициналық пункттер салудың басты мақсаты – ауыл тұрғындарына сапалы медициналық көмек көрсетіп, аудан орталығына немесе қалаға бармай-ақ қызмет алуына мүмкіндік жасау.
«Ауылдық денсаулық сақтауды жаңғырту» бағдарламасы аясында салынған нысандардың ерекшелігі – олардың барлығы қажетті медициналық құралдармен және жиһазбен толық қамтамасыз етілуінде. Бұл ауыл халқының денсаулығын нығайтуға, профилактикалық шараларды уақытылы өткізуге және скринингтік тексерулер жүргізуге ықпал етеді.
Шығыс Қазақстан облысы денсаулық сақтау саласын кадр, технология және инфрақұрылым бағыты бойынша жүйелі түрде жаңғыртып келеді. Маусым айында ШҚО әкімі Нұрымбет Сақтағанов медицинаны өңірдің басты басымдықтарының бірі деп атаған болатын.
«Медицина – қарқынды дамып келе жатқан сала. Ғылымдағы соңғы жетістіктер дәрігерлердің игілігіне жарап, халықтың денсаулығына қызмет етуі тиіс. Бүгінгі медицина қызметкерінен жанқиярлықпен бірге кәсібилік, үнемі даму, жаңа технологияларды енгізу талап етіледі», – деген еді өңір әкімі.
