«Зияткерлік әлемдегі әділетті болашақ: ақылды экономика мен жаһандық теңсіздік» деген тақырыппен өтетін бұл маңызды шарада жасанды интеллектің әртүрлі экономикаларға әсері және цифрлық трансформацияның ықпалы кеңінен талқыланады, деп хабарлайды TuraNews.kz.
Форумға ЭЫҰ-ға мүше елдермен қатар Швейцария, Франция, Ұлыбритания, АҚШ және Біріккен Араб Әмірліктерінен келген беделді сарапшылар қатысып, бес негізгі және екі арнайы сессияда өз ойларымен бөліседі. Бұдан бөлек, іс-шара аясында туризм министрлерінің саммиті, ЭЫҰ елдері атынан ағаш отырғызу рәсімі және Солтүстік-Шығыс Анадолы аймақтық мансап жәрмеңкесінің (KUDAKAF’25) ашылу салтанаты жоспарланған.
Эрзурум – жыл бойы өзінің тартымдылығын сақтайтын қала
Форум қонақтарын қарсы алуға дайын Эрзурум қаласы Түркиядағы жетекші қысқы туризм орталықтарының бірі – Паландөкен тауының етегінде орналасқан. Мұндағы Паландөкен шаңғы курорты түнгі шаңғы тебуге арналған жарықтандырылған трассаларымен және елдегі ең ұзын шаңғы жолымен ерекшеленеді. Осы ерекшеліктерінің арқасында қала 2025 жылы «Еуропаның қысқы спорт астанасы» мәртебесіне ие болды (ACES қауымдастығының шешімімен).
Дегенмен, Эрзурум тек қысқы ғана емес, сонымен қатар жазғы және көктемгі туризм үшін де қолайлы аймақ. Керемет табиғаты мен бай тарихи мұрасына ие бұл қала көктем мезгілінде жаяу серуендеуге және көптеген мәдени ескерткіштермен танысуға таптырмас орын.
Анадолының қақпасы саналған бұл қала – Ұлы Жібек жолының бойындағы ежелгі мәдени орталықтардың бірі. Улу мешіті, Қос мұнаралы медресе, Якутие медресесі және Үш күмбездер сияқты тарихи құндылықтар қаланың бай тарихынан сыр шертеді. Сонымен қатар, Мұстафа Кемал Ататүріктің үйі және тарихи Эрзурум конгресі өткен ғимарат Түркия Республикасының негізі қаланған маңызды нысандардың қатарында.
Эрзурум өзінің табиғатымен де таң қалдырады. Шығыс экспресс бағытында орналасқан қалада Түркиядағы ең биік сарқырамалардың бірі – Тортум сарқырамасы мен оның жанындағы көл, Узундере ауданының CittaSlow (баяу қала) мәртебесіне ие табиғи байлығы, Нарманның «Қызыл перілер» жартастары және Ыспирдегі көгілдір жанартаулық көлдер табиғатпен үйлесім тапқан керемет бағыттар болып табылады.
Эрзурумға келген соң оның ерекше дәмді тағамдарын татпай кету – үлкен өкініш. Әсіресе көлденеңінен қабатталған қой етінен жасалған джаг-кәуабы, Іспір бұршақтары және қадайыф долмасы сияқты дәстүрлі тағамдар мен жергілікті өнімдер нағыз гастрономиялық асыл мұра болып табылады. Сонымен қатар, Дживил ірімшігін (чечил ірімшігі), Карнавас тут пекмезін және Эрзурум су бөрегін де ерекше атап өткен жөн.
