Спорт

Дмитрий Попко Мексикадағы турнирдің ширек финалына шықты

Қазақстандық, әлемнің 175-ракеткасы Дмитрий Попко Морелос (Мексика) челленджер турнирінің ширек финалына жолдама алды.

Қазақстандық теннисші екінші айналымда дүниежүзілік рейтингіде 497-орында тұрған германиялық Макс Вискандтпен кездесті.

Германиялық спортшы әлемдік рейтингіде әлдеқайда төмен тұрғанына қарамастан, матч өте тартысты өрбіді.

Бірінші партияда Попко 7:5 есебімен басым түссе, екіншісінде Вискандт тай-брейкте есе қайырды — 7:6 (7:4).

Үшінші, шешуші сетте тай-брейкте Дмитрий таразы басын өзіне аудара білді — 7:6 (7:5).

Екі сағат 51 минутқа созылған бәсеке барысында Попко 10 эйспен бірге 8 брейк-пойнттың үшеуін пайдаға асырды. Вискандт 6 эйс, 2 брейкпен (5 брейк-пойнт) шектелді.

Дмитрий Попко жартылай финалға шығу үшін әлемнің 155-ракеткасы, аргентиналық Хуан Пабло Фиковичпен таласады.

Бір апта бұрын Мексикадағы Морелия челленджер додасында үздік шыққан Д. Попко қазіргі кезде ATP Live рейтингісінде 170-орынға көтеріліп тұр.

Source
Kazinform

TuraNews

Back to top button