«Бір шаңырақ астында»: Шығыс Қазақстанда ҚХА-ның 30 жылдығы аталып өтті

Биылғы жиын ерекше мәнге ие болды – ҚХА-ға 30 жыл толып отыр.

Сессияға түрлі сала өкілдері – этномәдени бірлестіктер, ғылым, өнер, мемлекеттік құрылымдар, Аналар кеңесі мен жастар ұйымдарының мүшелері қатысты. Сөз алған әрбір қатысушы Ассамблеяның маңыздылығын және қоғам алдында тұрған міндеттерді өз көзқарасымен атап өтті.

Облыс әкімі Нұрымбет Сақтағанов ҚХА-ның тұрақтылық пен сенімнің мызғымас негізі екенін айтты:

– Ассамблея – бұл бейресми, бірақ өте мықты тірек. Қазақстанда тұратын барлық этностардың мүдделері осы жерде тоғысады. Бірлік пен өзара түсіністік арқасында біз тұрақтылықты сақтап, дамып, сенімді болашақ құрып келеміз, – деді аймақ басшысы.

Әзербайжан этномәдени бірлестігінің төрағасы Элвин Демирчиев ҚХА-ның жеке адамдар тағдырына әсерін өз өмірінен мысал келтіре отырып жеткізді:

– Анам 20 жылдан астам уақыт бойы Достық үйінде әзербайжан тілін оқытады. Бұл – мен үшін үлкен еңбек пен үлгі. Өзім құрылысшымын, әрбір құрылыс мен үшін – жай ғана ғимарат емес, ол – адамдардың тағдыры, оларға жұмыс беріп, қолдау көрсету. Түрлі ұлт өкілдері бірге жұмыс істеп, бір-біріне көмектесіп, мықты мемлекет құра алатынын көріп отырмыз. Ассамблеяның мәні де – адамдарды ұлтқа бөлмей, біріктіруде деп ойлаймын, – деді Элвин Демирчиев.

ҚР Президенті жанындағы Мемлекеттік басқару академиясының ШҚО бойынша филиалының директоры Жанар Буканова мемлекеттік қызметшілерді этносаралық келісім саласында оқытудың маңызын атап өтті:

– Бүгінде қоғамдық келісім саласында шешім қабылдайтын адамдардың қажетті білімге ие болуы ерекше маңызды. Біз ҚХА және ШҚО ҚХА ғылыми-сараптамалық тобымен бірлесе отырып, мемлекеттік қызметшілерге арналған білім беру бағдарламасын әзірледік. Бұл бағдарлама диалог орнатуға, қабылдау мен ынтымақ атмосферасын қалыптастыруға көмектеседі. Егер жоба қолдау тапса, оны алдымен облыс деңгейінде, кейін республикалық деңгейде іске қосуға дайынбыз, – деді сарапшы.

Сессияның маңызды бөлігі – мемлекеттік наградаларды тапсыру болды.

«Парасат» орденімен елдің руханияты мен зияткерлік әлеуетін дамытуға қосқан үлесі үшін Геннадий Николаевич Пуссеп марапатталды.

Қазақстан халқы Ассамблеясының 30 жылдығына арналған мерейтойлық медальдармен Ассамблеяның ардагерлері марапатталды:

• Александр Николаевич Алексеенко — ШҚО ҚХА ғылыми-сараптамалық тобының мүшесі;

• Мария Баймухановна Бейсеканова — ШҚО ҚХА Аналар кеңесінің төрайымы;

• Александр Андреевич Яковлев — славян мәдени орталығының төрағасы;

• Ярослава Владимировна Волкович — украин мәдени орталығының төрайымы;

• Владимир Викторович Лебедев — «Сион» еврей мәдени орталығының төрағасы;

• Жұлдыз Сейткумаровна Актанжанова — Аналар кеңесі төрағасының орынбасары, «Үйлесім» ҚБ басшысы;

• Павлина Михайловна Пшимбаева — ШҚО кәрістер қауымдастығы төрағасының орынбасары;

• Лидия Генриховна Роот — «Видергебурт» неміс мәдени орталығының мүшесі;

• Валентина Васильевна Фрышко — поляк мәдени орталығы төрағасының орынбасары;

• Габдулхай Мухаметгалиевич Ишмуратов — татар мәдени орталығының төрағасы;

• Алдияр Ақылбекұлы Әубәкіров — ШҚО ҚХА Ақсақалдар кеңесі төрағасының орынбасары;

• Татьяна Абдуловна Кагерманова — «Вайнах» шешен-ингуш қоғамдық бірлестігінің төрайымы;

• Галина Августиновна Борисович — «Шығыс Қазақстандық беларусь мәдени орталығы» ҚБ төрайымы.

Облыс әкімі әрбір марапатталған азаматты жеке құттықтап, өңірдегі қоғамдық келісімді сақтау мен мәдени әралуандылықты дамытуға қосқан үлесі үшін алғысын білдірді.