Атом электр станциясын Семей полигонымен салыстыруға болмайды
Қазақстанда атом электр стансасын (АЭС) салуға қатысты пікірталастарда әртүрлі пікірлер бар. Біреулер бұл жобаны Семей ядролық полигонының қасіретті тарихымен салыстырса, «АМАНАТ» партиясы Түркістан облыстық филиалының төрағасы, облыстық мәслихаттың депутаты Алтынсары Үмбеталиев мұндай салыстыруды дұрыс емес деп санайды. Ол ядролық отынды әскери мақсатта және энергия өндіруге пайдалану мүлдем басқа нәрсе екенін, тұрғындардың радиациялық ластанудан қорықпау керектігін айтты.
«Елімізде АЭС салуға қатысты түрлі пікірлер айтылып жүр. Соның ішінде бұл бастаманы Семей полигонымен салыстырып жатқандар да бар. Ядролық отынды қару ретінде пайдалану мен бейбіт мақсатта қолдану – бір-бірімен мүлде үйлеспейтін түсініктер. Сондықтан, тұрғындардың радиациядан зардап шегу қатері жоқ екенін айтуға тиіспіз.
Енді біреулер Чернобыль мен Фукусима апаттарын мысалға келтіреді. Біріншіден, Чернобыль АЭС-ы 1977 жылы салынған болса, Фукусима стансасы 1971 жылы іске қосылған. Олар сол кездегі ең мықты технологиялармен салынған бірінші буындағы реакторлар болатын. Қазір дәуір басқа, технология содан бергі кезеңде қарыштап дамыды. Бізде салынатыны ІІІ және ІІІ+ буындағы реакторлар болады. Екіншіден, Чернобыльдегі апат адам салғырттығынан орын алса, Фукусимадағы апат мұхиттағы цунамидің салдарынан болды.
Жаңа буын стансалар 9,2 баллдық жер сілкінісіне төтеп бере алатындай боп салынады. Атом стансаларының салынуы МАГАТЭ – Атом энергиясы жөніндегі Халықаралық агенттіктің тікелей қадағалауымен іске асады. Жобасы, салынуы, іске қосылуы және жұмыс істеп тұруы – түгелдей халықаралық мамандардың бақылауында болады», — деп айтты Алтынсары ҮМБЕТӘЛИЕВ — «AMANAT» партиясы Түркістан облыстық филиалының төрағасы, облыстық мәслихат депутаты
