2026 жылғы 7 ақпан, сенбі күні ұйымдастырылған жиынға Өкілетті кеңес төрағасы, профессор Мухиттин Шимшек жетекшілік етті. Отырысқа Түркия Республикасының Мәдениет және туризм министрінің орынбасары, доктор Сердар Чам, Түркия мен Қазақстан тарапынан Өкілетті кеңес мүшелері, ректор, доктор Жанар Темірбекова, ректор орынбасарлары мен әкімшілік қызметкерлер қатысты.
Жиынның ашылуында сөз сөйлеген Өкілетті кеңес төрағасы, профессор Мухиттин Шимшек университеттің іргетасы қаланған күннен бастап Түркі әлемінің интеллектуалдық әлеуетін арттыруға қосқан үлесіне тоқталды. Шимшек мырза 80-ші отырыстың тарихи маңызын атап өтті.
«Ахмет Ясауи университеті тек білім ордасы ғана емес, сонымен бірге Түркия мен Қазақстан арасындағы бауырластық алтын көпірінің ең айқын нышаны», – деп мәлімдеді.
Университет ректоры, доктор Жанар Темірбекова кеңес мүшелеріне арналған есебінде өткен академиялық кезеңдегі жетістіктерге, студенттердің қанағаттану деңгейіне және ғылыми-зерттеу жобаларының өсіміне қатысты деректермен бөлісті.
«Біздің мақсатымыз – Қожа Ахмет Ясауи есімін иеленген бұл білім ордасын әлемдік рейтингтерде лайықты орынға шығару», – деді Темірбекова.
Жиын барысында университеттің қазіргі жағдайы мен болашақ даму стратегиясы жан-жақты талқыланды.
Төрт сағатқа созылған отырыс күн тәртібіндегі мәселелер бойынша шешімдер қабылданғаннан кейін ұсыныс-тілектер бөлімімен жалғасты. Кеңес мүшелері екі ел арасындағы мызғымас достықтың білім саласындағы көрінісіне жоғары баға берді.
Өкілетті кеңестің 80-ші отырысы қабылданған шешімдердің Түркия, Қазақстан және бүкіл Түркі әлемі үшін игілікті болуына тілектестік білдірумен және естелік суретке түсумен аяқталды.
