«Алтын күз-2025» туристік слеті Шығыс Қазақстанда саяхатшыларды біріктіреді

Уба өзенінің сол жағалауында Шемонаиха ауданының мектеп оқушылары дәстүрлі «Алтын күз- 2025» туристік слетіне жиналады. Шара Халықаралық туризм күніне арналған.

Қатысушылар геопозиция бойынша бағдарлау, от жағу, арқан арқылы өткелден өту, су слаломы және алғашқы көмек көрсету кезеңдерінде бақ сынайды. Әр кезең жасөспірімдерден тек күш пен төзімділікті ғана емес, сондай-ақ командамен жұмыс істеу шеберлігін де талап етеді.

Жарыс қорытындысы бойынша үздік командалар кубоктармен және грамоталармен марапатталады. Ұйымдастырушылар – Шемонаиха ауданы әкімдігі жанындағы «Жастар ресурстық орталығы» КММ және «ORTUS» туристік клубы.

Туристік мереке аудан жастарының басын қосып қана қоймай, табиғатты аялауға және салауатты өмір салтын ұстануға тәрбиелейтін маңызды шараға айналады.