Көктемнің шуақты күндерінде Түркия тек демалыс орыны ғана емес, ірі халықаралық спорттық шаралардың орталығына айналып отыр. Жерорта теңізінің інжу-маржаны саналатын Анталия өзінің жұмсақ климаты, тарихи мұрасы және су мен тау спортына арналған мүмкіндіктерімен миллиондаған саяхатшыны баурап келеді. Осы өңірдің ең көрікті жері — Аланияда биыл 27-28 наурыз күндері Alanya Ultra Trail халықаралық жарысы өтеді. Тавр тауларының салқын баурайы мен теңіз жағалауын жалғайтын бұл дода спорт сүйер қауым үшін көктемгі маусымның ең жарқын оқиғасы болмақ.
2017 жылдан бері өткізіліп келе жатқан аталған марафон Халықаралық трейлраннинг қауымдастығымен (ITRA) танылған. Осы уақытқа дейін 34 елден 700-ден астам спортшы қатысқан бұл шара Анталияның бірегей географиясы мен табиғатпен үндескен өмір салтын паш етеді.
2026 жылғы жарыс «Дәстүрден трейлге» (Tradition to Trail) ұранымен ұйымдастырылып отыр. Марафон бағыттары ерте кезден еркіндікті сүйген түрік көшпенділері — йөрүктердің (Yörüks) көші-қон жолдарымен өтеді. Қатысушылар бір жарыстың ішінде төрт мезгілдің ауа райын сезінуге мүмкіндік алады: Тавр тауларының қар басқан шыңдарынан бастап, Клеопатраның әйгілі жағажайына дейін созылатын жол керуен соқпақтары мен тарихи нысандарды басып өтеді.
Жарыс жолында атлеттер мынадай киелі және тарихи орындарды көре алады:
-
Дамлаташ үңгірі мен әлемге әйгілі Клеопатра жағажайы.
-
Қызыл мұнара (Kızıl Kule), ежелгі кеме жасау зауыты (Терсхане) және Алания қамалы.
-
Тавр тауларының асқар белдері мен жайлаулары.
Спортшыларға қашықтығы әртүрлі бес бағыт ұсынылады: ең ұзыны 68 шақырымдық Alanya Ultra Trail (AUT) болса, табиғат әуесқойлары үшін 5 шақырымдық Alanya Castle Run (ACR) бағыты қарастырылған.
Анталияның құпия жауһары — Алания
Жерорта теңізінің жағасында орналасқан Алания — тарих пен бүгінгі заманның ажырамас бірлігі. XIII ғасырда Селжұқтар негізін қалаған бұл қала бүгінгі күнге дейін жақсы сақталған Алания қамалымен мақтана алады. Қамалдан төмен қарай созылған тар көшелер дәстүрлі үйлер мен жайқалған бақтарға ұласып, теңіз жиегіне дейін апарады.
Мұндағы табиғи көрікті жерлердің қатарында «Көк ту» иегері атанған Инджеқұм мен Клеопатра жағажайлары, сондай-ақ Сападере каньоны мен Дим өзені бар. Бұл мекендер көктемде ерекше құлпырып, серуендеуге таптырмас жағдай жасайды.
Гастрономия мен көңілді кештер
Спорттық додадан кейін Аланияның бай асханасынан дәм тату — бөлек бір ғанибет. Көше тағамы — гөзлемеден бастап, Жерорта теңізінің балғын теңіз өнімдеріне дейін талғампаз жанның қалауынан шығады. Әсіресе, отқа піскен сегізаяқ пен балық тағамдары жергілікті тахини қосылған «пияздармен» (ақ бұршақ салаты) керемет үйлеседі.
Күн батқаннан кейін Аланияның түнгі өмірі жандана түседі. Жанды дауыстағы музыка мен жағалаудағы көңілді кештер саяхатшыларға мерекелік көңіл-күй сыйлайды.
Түркияның осынау шуақты өлкесі спорттық рухты шыңдап қана қоймай, табиғат пен тарихтың тереңіне бойлағысы келетін әрбір жанға ұмытылмас көктемгі демалыс сыйлайды.
