1 шілдеден бастап барлық өңірде коммуналдық қызметтердің тарифтері кезең-кезеңімен өзгертіледі. Премьер-Министр Әлихан Смайылов «Amanat» атынан сайланған мәслихат депутаттарының республикалық форумында осындай мәлімет айтты, деп жазады Turanews.kz.
«Инженерлік-коммуналдық желілерді жаңарту және апатты жағдайлардың санын азайту үшін «Тарифті инвестицияға айырбастау» бағдарламасы іске асырылып жатыр. Жыл соңына дейін тұрғын үй-коммуналдық шаруашылығы саласына 234 млрд теңге инвестиция тарту жоспарда. Бұл қаражат 12,7 мың жабдықты және 5 800 км инфрақұрылым желілерін жөндеуге бағытталады. Осы саладағы жұмысшылардың жалақысы 50-ден 100%-ке дейін өсіріледі. 1 шілдеден бастап барлық өңірде коммуналдық қызметтердің тарифтері кезең-кезеңімен өзгертіледі», — деді Үкімет басшысы.
Әлихан Смайыловтың сөзінше, алдағы 7 жылда коммуналдық-инженерлік инфрақұрылымды жаңғыртуға 3 трлн тенгеден астам инвестиция салынады.
«Тұрғын үй саласында жағдайды жақсарту үшін 2029 жылға қарай барлық көздер есебінен 111 млн шаршы метр тұрғын үй салынады. Оның ішінде биыл – 15,3 млн шаршы метр», — деді Премьер-Министр.
