Azərbaycan Çin ilə investisiya əməkdaşlığına dair saziş imzalayıb
“Azərbaycan İqtisadiyyat Nazirliyi və Çinin Milli İnkişaf və İslahat Komissiyası arasında istehsal gücləri və investisiya əməkdaşlığının gücləndirilməsi haqqında Çərçivə Sazişi” imzalanıb.
Turanews.kz xəbər verir ki, bu barədə iqtisadiyyat naziri Mikayıl Cabbarov özünün “X” (tvitter) sosial şəbəkə hesabında yazıb.
Nazir qeyd edib ki, saziş Çinin Milli İnkişaf və İslahat Komissiyasının sədri Cenq Şanciye ilə görüşdə imzalanıb. Onun sözlərinə görə, sazişin icrası ikitərəfli iqtisadi əlaqələrin gücləndirilməsinə və investisiya sahəsində əməkdaşlığın möhkəmləndirilməsinə töhfə verəcək.
“C.Şanciye ilə görüşdə Azərbaycan-Çin iqtisadi münasibətlərinin inkişafı istiqamətində reallaşdırılan təşəbbüslər, ölkəmizin “Bir kəmər, bir yol” layihəsində iştirakı, qarşılıqlı investisiyaların təşviqi və əməkdaşlığın möhkəmləndirilməsi barədə fikirlərimizi bölüşdük”, – deyə nazir bildirib.
Qeyd edək ki, iqtisadiyyat naziri Mikayıl Cabbarovun rəhbərlik etdiyi nümayəndə heyəti hazırda Çində rəsmi səfərdədir. Səfər çərçivəsində Pekində Azərbaycan Ticarət Evinin açılış mərasimi və digər tədbirlər nəzərdə tutulub.
